Մենք առաջարկում էինք համատեղ մշակել առաջարկությունների այն փաթեթը, որն իսկապես կստիպեր ապակենտրոնացնել իշխանական համակարգը, որոշումների կայացումը դարձնել ավելի թափանցիկ և սահմանափակել, նվազեցնել իշխանությունների վերարտադրությունը:
Այս մասին այսօր լրագրողների հետ զրույցում ասաց ՀՅԴ պատգամավոր Աղվան Վարդանյանըˋ անդրադառնալով սահմանադրական բարեփոխումներին և ԲՀԿ-ի, ՀԱԿ-ի և Ժառանգության մոտեցումներին:
«Առանցքային հարցերի շուրջ գայինք համաձայնության և ասեինք, եթե սահմանադրական բարեփոխումների այս դրույթները ներառվեն և ընդունվեն, բնականաբար այս պարագայում ավելի ուժեղ կլիներ մերˋ ընդդիմության դիրքորոշումը և ավելի դժվար կլիներ իշխանության կողմից դա չանելը: Մեր երկրի պետական հետագա ընթացքի համար ամենամեծ վտանգը կարող է լինել այն, որ, հանկարծ, առաջիկա այս աշնանային զարգացումներինˋ հանրահավաքին, մեր գործընկերները որոշեն, որ հիմնական պահանջ պետք է դարձնեն սահմանադրական փոփոխություններից հրաժարվելը»,-ասաց Վարդանյանը:
Նա ասաց, որ շատ կափսոսի և կցավի, եթե եռյակը հանկարծ որոշի հիմնական պահանջ դարձնել այն, որ իշխանությունը հրաժարվի սահմանադրական փոփոխություններից:
«Սա մեր երկրի համար կլինի ամենասխալ ընթացքը և հանրահավաքին մասնակցող ուժերը կամա, թե ակամա կնպաստեն ներկա իշխանությունների դիրքերի ամրապնդմանը և վերարտադրմանըˋ նույն ընտրական համակարգով, նույն ուժային լծակներով»,-հավելեց Վարդանյանը:
