Մի քանի օր առաջ ԱԺ քվեարկության արդյունքում քվորում չապահովվելու պատճառով տապալվեց «Հրազդանի ցեմենտ» գործարանի հարկային պարտավորությունների տույժերի դուրսգրման մասին օրինագծի երրորդ ընթերցման քվեարկությունը, երբ նիստին ներկա բազմաթիվ պատգամավորներ պարզապես չմասնակցեցին քվեարկությունը:
Հիշեցնենք, նախատեսվում էր «Հրազդան-Ցեմենտ» ընկերությանը ազատել 2016թ. փետրվարի 1-ի դրությամբ հաշվարկված, բայց չվճարված հարկային և պարտադիր սոցիալական ապահովագրության գծով առաջացած տույժերից` 510 մլն 125 հազար դրամ ընդհանուր գումարի չափով:
Մի շարք պատգամավորներ մեղադրեցին սեփականատիրոջը, հարկային պարտավորությունների անբարեխիղճ կատարման մեջ, որի արդյունքում էլ ստեղծվել է այս իրավիճակը: Գործարանը շահույթ ապահովող ձեռնարկությունն է, ինչու˚ պետք է հարկային պարտավորությունների տույժերը դուրս գրվեն, անհասկանալի էր մնում պատգամավորների համար: Մեղադրանքներ հնչեցին, որ Կառավարությունը ընտրովի քաղաքականություն է վարում, հարկային արտոնություններ տրամադրելով շատ հաճախ ոչ անհրաժեշտ և չհիմնավորված դեպքերի համար:
Անշուշտ ցանկացած ձեռնարկության վատ մենեջմենթի և հարկային չարաշահումների պատճառով չպետք է որևէ հարկատու ազատվի իր հարկային պարտավորություններից, առավել ևս անհավասար մրցակցային նախադեպեր ստեղծվեն բիզնեսի համար, սակայն ունենք այն ինչ ունենք:
1. Նախ «Հրազդան-Ցեմենտի» անկայուն աշխատանքը պայմանավորված է եղել համաշխարհային ֆինանսատնտեսական ճգնաժամի տարիներին հանրապետությունում շինարարության տեմպերի կտրուկ անկման հետևանքով, ինչը բացասական ազդեցություն է ունեցել ընկերության ֆինանսատնտեսական գործունեության վրա:
2. Ընկերությունը նախատեսում է ընդլայնել ցեմենտի արտադրությունը՝ 2016 թվականի տարեկան ծավալը հասցնել մինչև 200 հազ.տ (2014թ` 23,3 հազ.տ., 2015թ.` 75. հազ.տ) և ստեղծել լրացուցիչ աշխատատեղեր, որի համար անհրաժեշտ են զգալի միջոցներ: Արդյունքում պետական բյուջե կվճարվի ավելի քան 700 մլն դրամի հարկեր:
3. Ընկերության գույքը վարկային պարտավորությունների դիմաց գրավադրված է «ՎՏԲ-Հայաստան Բանկ» ՓԲ ընկերությունում և վերջինիս է պատկանում ընկերության պարտավորությունների դիմաց առաջնահերթ բավարարման իրավունքը: Այսինքն, ընկերության գույքը և հաշիվները գտնվում են արգելանքի տակ և գույքի հարկադիր վաճառքը կհանգեցնի ձեռնարկության տեխնոլոգիական ամբողջության խաթարմանն ու գործունեության դադարեցմանը, որի արդյունքում կփակվեն ընկերությունում առկա 470-ից ավելի աշխատատեղերը: Եվ ձեռնարկությունը ընդհանրապես կկանգնի սննկացման և քայքայման եզրին:
Կառավարությունը շահագրգիռ կողմերի մասնակցությամբ քննարկումների արդյունքում նպատակահարմար գտել ընկերության կողմից պետական բյուջեի հանդեպ կուտակած հարկերի մասով առաջացած տույժերի ներման միջոցով` հնարավորություն ընձեռել Ընկերությանը շարունակելու արտադրական գործունեությունը, որի արդյունքում վերջինս կմարի պարտքի մայր գումարները:
Կառավարության պատճառաբանությունն էլ կարող է լինել այն, որ ձեռնարկության սննկացման դեպքում, մեղադրանքներ կհնչեն, թե ինչու Կառավարությունը ոչ մի անհրաժեշտ քայլեր չարեց Հրազդան քաղաքի, և ինչու ոչ՝ մեր երկրի համար կարևոր ձեռնարկություններից մեկի՝ «Հրազդան ցեմենտի» փրկության համար:
