Հունվարի 23-ի առավոտյան Տավուշի մարզի Բերդի տարածաշրջանի մարտական դիրքերի մի քանիսի ուղղությամբ ադրբեջանական բանակի հատուկ նշանակության ստորաբաժանումների կողմից իրականացված հարձակման հետևանքով վիրավորված զինծառայող Հովհաննես Ավանեսյանի վիճակը շարունակում է ծայրահեղ ծանր լինել: Այս մասին Araratnews-ի թղթակցի հետ զրույցում հայտնեց Կենտրոնական կայազորային հոսպիտալի պետ Արամ Ասատուրյանը: «Հովհաննեսի վիճակը սկզբից էլ ծանր է եղել: Հիմա էլ շարունակում է ծարահեղ ծանր մնալ՝ հաշվի առնելով վիրավորման բնույթը և վիրահատության ծավալը»:
Զինծառայողի կյանքի համար շատ կարևոր օրգաններ էին վիրավորված՝ հայտնեց Արամ Ասատուրյանը: «Թոքն էր վիրավորված, ինչպես նաև լյարդն ու ողնաշարը: Այսպիսի վիրավորված օրգաններ ունեցող մարդու վիճակը ինչպես կարող է ծանր չլինել: Մենք պայքարում ենք ներկա պահին զինծառայողի կյանքի համար»:
Չնայած զինծառայող Հովհաննես Ավանեսյանի վիճակը ծայրահեղ ծանր է, սակայն, Արամ Ասատուրյանը վիճակի դեպի լավը գնացող միտում է տեսնում: «Վիճակի դեպի լավը գնացող միտում իհարկե տեսնում եմ: Հովհաննեսը ամուր տղա է»:
