ԱՄՆ-ն Իրաքին 181 մլն դոլարի մարդասիրական օգնություն կտրամադրի: Այդ մասին հայտնել է ԱՄՆ-ի պետքարտուղարի տեղակալ Էնթոնի Բլինքենը, հայտնում է AlSumaria հեռուստաալիքը:
Հեռուստաալիքը նշում է, որ Վաշինգտոնը մարդասիրական օգնություն կտրամադրի Իրաքին «մոտակա ժամանակում»: Ընդգծվում է նաեւ, որ ԱՄՆ-ի գնահատականի համաձայն, Մոսուլի ազատագրման ռազմական գործողության սկզբի հետ` տվյալ շրջանից փախստականների թիվը կգերազանցի միլիոն մարդը: ԱՄՆ-ի պետքարտուղարի տեղակալ Էնթոնի Բլինքենը պատվիրակության հետ Իրաք է ժամանել երեքշաբթի` սեպտեմբերի 13-ին: Պատվիրակությունը մտադիր է երկրի իշխանությունների հետ քննարկել «Իսլամական պետության» գրոհայինների դեմ պայքարի հարցեր, ինչպես նաեւ Մոսուլի նկատմամբ վերահսկողության վերականգնման գործողությունը:
