ԱԺ արտահերթ նիստում այսօր քննարկվեց նաեւ «Վարչական իրավախախտումների մասին օրենքում փոփոխություններ և լրացումներ կատարելու մասին նախագիծը»: Նախագծի վերաբերյալ տեսակետ հայտեց ԱԺ ԲՀԿ խմբակցության ղեկավար Նաիրա Զոհրաբյանը: Նա հայտարարեց, որ ԲՀԿ-ն կողմ կքվեարկի այս նախագծին, անկախ այն հանգամանքից, որ իր խմբակցությունը ոլորտը կարգավորող մի շարք նախագծեր է ներկայացրել, որոնք մերժվել են: «Վարորդները երազում արդեն հոծ ու կարմիր գծեր են տեսնում, և ոչ մեկն այնքան ջանասիրաբար առավոտյան չի աշխատում, որքան հոծ գծերը թարմացնող անձինք, քանի որ ամեն հոծ գիծ մեկ միլիմետր անցնելու դեպքում 5000 դրամ է ստացվում: Սակայն բոլորին էլ հայտնի է, որ անգամ Շումախերը երևանյան փողոցներում չի կարող մեքենան այնպես վարել, որ հոծ գիծը չտրորի ու օրը մի քանի տուգանքի չարժանանա»,- նշեց Զոհրաբյանը:
Նա հայտարարեց՝ ԲՀԿ-ն կողմ կքվեարկի նախագծին, որ գոնե մարդիկ երազում հոծ գիծ չտեսնեն, միևնույն է, նրանք գտնում են, որ մեքենան ոչ սթափ վարող վարորդների համար պետք է ավելի խիստ պատժամիջոց մշակվեր: Նաիրա Զոհրաբյանն ասաց, որ հետագայում առաջարկելու են տուգանքների չափի նվազում սահմանել: «Պետք է շատ ավելի խստացվեր ոչ սթափ վարորդների նկատմամբ պատիժը, քանի որ մենք շատ լավ գիտենք և տիրապետում ենք վիճակագրությանը, թե որ արտոնյալների արտոնյալ զավակներ են ոչ սթափ վիճակում մեքենա վարում և դառնում զոհերով ավարտված ավտովթարների «հերոսներ»»,- եզրափակեց Նաիրա Զոհրաբյանը:
