Ինչպես ավելի վաղ տեղեկացրել էինք, այսօր Երևանի տոնավաճառների առևտրականները բողոքի ակցիա էին անցկացրել ՀՀ կառավարության շենքի դիմաց: Խնդիրն այս տարվա հոկտեմբերի 1-ից ուժի մեջ մտնող «Շրջանառության հարկի մասին» ՀՀ փոփոխված օրենքն է: Բանն այն է, որ խոշոր բիզնեսի ներկայացուցիչները հաճախ ապրանքների վերաբերյալ փաստաթղթեր չեն տրամադրում փոքր ու միջին ձեռնարկություններին, ինչի պարագայում վերջիններս իրենց հերթին չեն կարող փաստաթղթեր ներկայացնել համապատասխան մարմիններ:
ՀՀ վարչապետ Հովիկ Աբրահամյանը քիչ առաջ ընդունել է ցուցարարներից 10-ը հոգու: Վարչապետը նրանց ասել է, որ այս օրենքի նպատակն այն է, որ փոքր ու միջին բիզնեսի օգնությամբ խոշորներին օրինականության դաշտ բերեն: Նշենք, որ վարչապետի սենյակը լքելուց հետո ցուցարարները մնացել են կենտրոնական հրապարակում: Նրանք այս պահին վանկարկումներ են հնչեցնում եւ փակել են ճանապարհները:
