Այսօր ՀՀ Կառավարության նիստին Վերահսկիչ պալատի նախագահ Իշխան Զաքարյանը ներկայացրեց Վերահսկիչ պալատի արդյունքները մի ծրագրի շուրջ, որի շրջանակներում 2006-2013-ին 74 դպրոցների շինարարության վրա ծախսվել է 22 միլիարդ դրամ:
Ըստ ծրագրիˋ մնացել է 11 միլիարդ դրամ դպրոցների շինարարությունը ավարտելու համար:
«Վերահսկիչ պալատի արդյունքում արձանագրվել է, որ 74 դպրոցներից որևէ մեկի շինարարությունը ավարտված չէ: Օրինակˋ Գավառի թիվ 5 դպրոցին պայմանագրով նախատեսված է 574 միլիոն դրամ վերանորոգելու համար, իսկ 6 տարվա ընթացքում տրամադրվել է 280 միլիոն դրամ, այսինքն նախատեսվածի կեսը: Ցավոք, բոլոր դպրոցների համար գրեթե նույն ձեռագիրն է»,-ասաց Զաքարյանը:
Նա նշեց, որ ստուգումների արդյունքում նաև արձանագրվել է, որ կառավարությունը ուշադրություն չի դարձրել դպրոցների սեյսմակայունության խնդիրներին, և միայն հարցը բարձրացնելուց հետո հաստատվել է, որ կան դպրոցներ, որտեղ արդեն կատարված աշխատանքները ենթակա են քանդման, քանի որ այդտեղ սեյսմակայունության խնդիրները լուծված չեն:
Քաղաքաշինության նախարար Նարեկ Սարգսյանը արձագանքեց և ասաց, որ հնչած մտահոգությունները իրական են:
«Ծրագրից հանվելու են որոշ օբյեկտներ, որոնք վրա գումարներ են ծախսվել, և հիմա տեխնիկական եզրակացության արդյունքում նախորդ տարիների կատարած աշխատանքները պետք է քանդվեն»,-հավելեց Սարգսյանը:
Վարչապետ Հովիկ Աբրահամյանը նույնպես մտահոգվեց և ասաց, որ խնդիրը շատ լուրջ է:
«Ես չեմ հասկանում, ինչպես կարելի է մի դպրոցում շինարարություն սկսել ` առանց սեյսմիկ անվտանգության խնդիրները ուսումնասիրելու: Փաստորեն, այն գումարները, որ ներդրվել են, առոչի՞նչ են»,-ասաց վարչապետը:
