Էստոնիայում երեկ ավարտվել են հերթական խորհրդարանական ընտրությունները։ Առաջին հորիզոնականը զբաղեցրել է Բարեփոխումների կուսակցությունը՝ հավաքելով քվեարկողների ձայների 27.7 տոկոսը։ Այս կուսակցությունը նախկինում էլ էր գլխավորում իշխող կոալիցիան։ Կուսակցությունը կստանա խորհրդարանի տեղերի մոտ 30 տոկոսը։
Երկրորդ տեղում Կենտրոնամետ կուսակցությունն է՝ 25 տոկոսով, երրորդում՝ Սոցիալ-դեմոկրատական կուսակցությունն է՝ 15.2 տոկոս։
Խորհրդարանական ընտրություններին մասնակցել է 900 հազար ընտրողներից 574 հազարը։ Հաղթանակից հետո բարեփոխիչների առաջնորդ Թավի Ռիյվասն ասել է, որ կկազմավորվի երեք կուսակցությունից բաղկացած կոալիցիա։ Նա բացառել է, որ խորհրդարանում նրանք կհամագործակցեն Կենտրոնամետ կուսակցության հետ, որին ավանդաբար աջակցում են Էստոնիայի ռուսախոսները։
