«Էրեբունի-Երևան» տոնակատարության նախապատրաստական վերջին աշխատանքներն են ընթանում, սակայն քաղաքապետարանն առ այսօր հրաժարվում է ներկայացնել տոնակատարության ծախսերի նախահաշիվը։
Ավագանու ընդդիմադիր «Բարև Երևան» խմբակցության անդամ Ստյոպա Սաֆարյանը պատրաստվում է գրությամբ դիմել քաղաքապետարան՝ այդ ծախսերի նախահաշիվը տրամադրելու պահանջով։
«Մենք «Բարև Երևան» խմբակցության նիստ գումարեցինք։ Եվ քանի որ, ցավոք սրտի, ընթացակարգն այնպիսին է, որ մենք հնարավորություն չունենք հաստատելու կամ դիրքորոշում հայտնելու «Էրեբունի-Երևան» տոնակատարությունների համար ծախսվող միջոցների կապակցությամբ, որովհետև այդ գումարները ներառված են լինում արդեն 2015 թվականի բյուջեում, և փաստացի հենց այդ ժամանակ են հաստատվել, բնականաբար, մեզ ոչինչ չի մնում, քան պարզել, թե կոնկրետ որ միջոցառումների վրա ինչպիսի միջոցներ են ծախսվում», — ասաց Սաֆարյանը «Ազատության» հետ զրույցում։
Ավագանու անդամն ընդգծեց, որ ստացել են և՛ միջոցառումների հրավիրատոմսերը, և՛ ծրագիրը, որտեղ թվարկված են մի քանի տասնյակ միջոցառումներ՝ սկսած ջրցան մեքենաների շքերթից, հուշարձանների լվացումից, ինչ-որ կարաոկե համերգներ և այլն։ «Գրություն կուղարկեմ Երևանի քաղաքապետին՝ խնդրելով ներկայացնել տող առ տող, ծրագիր առ ծրագիր, միջոցառում առ միջոցառում նախատեսված ծախսերը», — նշեց Ստյոպա Սաֆարյանը։
Ըստ Ստյոպա Սաֆարյանի, Երևան քաղաքում տոնակատարությունների վրա ծախսվող գումարները բացարձակապես համաչափ չեն այն խնդիրներին, որոնք ունի Երևան համայնքը։ «Մենք շարունակում ենք պնդել, որ այդ միջոցները կարող են ուղղվել և պետք է ուղղվեն առավել հրատապ խնդիրներին», — ասաց Սաֆարյանը։
Մանրամասները՝ սկզբնաղբյուր կայքում։
