Սեպտեմբերի 21-ին անկախությանը նվիրված տոնակատարությունը իրենց մասնակցությունն են ունեցել նաև Երևանի տարբեր դպրոցների աշակերտներ, որոնց տոնի առթիվ նվիրել էին եռագույնը խորհրդանշող գլխարկներ: Այսօր araratnews.am-ին ահազանգած ծնողներից մեկը մեզ հայտնեց, որ տոնակատարությունից հետո Երևանի Եղիշե Չարենցի անվան №67 դպրոցի աշակերտներից գլխարկները հետ են վերցրել:
Տեղեկատվությունը ճշտելու համար կապ հաստատեցինք դպրոցի տնօրեն Անահիտ Խեչումյանի հետ: Նա մեզ հետ զրույցում նշեց, որ իր դպրոցի աշակերտներից ոչ ոք գլխարկները չի վերցրել. «Մենք մեր երեխաներին միջոցառումից հետո տուն ենք ճանապարհել: Իմաստը որն էր, որ հետ վերցնեինք: Բայց քանի որ առջևում «Էրեբունի Երևան» տոնակատարությունն է, հնարավոր է մյուս դպրոցների դասղեկները հավաքել են, որ նորից բաժանեն երեխաներին, որովհետև այդ օրը մեր դպրոցում 15-20 այլ դպրոցներից են աշակերտներ ու ուսուցիչներ եղել: Ես միայն իմ դպրոցի համար կարող եմ պատասխանատվություն կրել ու ասել, որ իմ հրահանգով ոչ մի նման բան չի եղել ու ես ոչ մի բողոք չեմ լսել»:
