Թուրքիան չի ստորագրել Վաշինգտոնի կողմից «Իսլամական պետության» դեմ պայքարի կոալիցիա ստեղծելու մասին հռչակագիրը, որն ընդունվել է Սաուդյան Արաբիայի Ջիդդա քաղաքում` տարածաշրջանի և ԱՄՆ-ի արտաքին քաղաքական գերատեսչությունների ղեկավարների խորհրդակցության արդյունքում։ Այս մասին հաղորդում է թուրքական NTV-ն՝ նշելով, որ Թուրքիան Ջիդդայյում ներկայացված էր նորանշանակ արտգործնախարար Մևլյութ Չավուշօղլուով։
Բացի Թուրքիայից և ԱՄՆ-ից, Ջիդդայում ներկա էին Եգիպտոսի, Հորդանանի, Իրաքի, Լիբանանի, Ծոցի արաբական երկրների համագործակցության խորհրդի վեց անդամները։ Հռչակագրում պատրաստակամություն է հայտնվում դիմակայելու ահաբեկչական ակտիվությանը, այդ թվում՝ Իսլամական պետություն խմբավորմանը։ Նշվում է ահաբեկիչներին ֆինանսավորման և մարդկային համալրման հնարավորությունից զրկելու մասին։
Ավելի վաղ Թուրքիան հայտնել էր իսլամիստ ծայրահեղականների դեմ պայքարելու անհրաժեշտության մասին, սակայն հավելել, որ չի ցանկանում լինել այդ պայքարի կենտրոնում, այլ պատրաստ է փոխանցել հետախուզական տեղեկություններ, մասնակցել սահմանի ամրապնդմանն ու լոգիստիկ գործողությունների։
Մասնագետները նշում են, որ Թուրքիայի նման զգուշավորությունը հիմնականում պայմանավորված է նրանով, որ իսլամիստների ձեռքում են գտնվում Մոսուլում Թուրքիայի հյուպատոսության 49 քաղաքացիներ, որոնց կյանքին վտանգ է սպառնում Թուրքիայի ակտիվ գործողությունների արդյունքում։
