Եվրախորհրդարանի նախագահ Մարտին Շուլցը խիստ քննադատության է ենթարկել թուրքական իշխանությունների քաղաքականությունը, տեղեկացնում է Ռիա Նովոստին` վկայակոչելով գերմանական լրատվամիջոցները:
«Թուրքիան ժողովրդավարական քաղաքական զարգացման լավագույն ուղով չի գնացել»,- հայտարարել է Շուլցը՝ Համբուրգում լրագրողների հետ հանդիպմանը:
Նա նշել է, որ նախագահ Էրդողանի օրոք Թուրքիայում սաստկացել են լրագրողների, ընդդիմադիր և արվեստի գործիչների հետապնդումները, իսկ քրդերի հետ հակամարտությունը նոր թափով է բռնկվել:
«Այդ հակամարտությունում Թուրքիան չի կարողանա հաղթել ռազմական ճանապարհով: Այն պետք է լուծվի խաղաղ միջոցներով»,- ասել է Շուլցը:
Միաժամանակ, Եվրախորհրդարանի ղեկավարն անհրաժեշտ է համարել Եվրամիության և Թուրքիայի համագործակցությունը միգրանտների հոսքի դեմ պայքարում:
