ՀՀ ԱԺ գյուղատնտեսական և բնապահպանական հարցերի մշտական հանձնաժողովում այսօր տեղի ունեցած ՝ «Անազատ և կիսաազատ պայմաններում վայրի կենդանիներին պահելու օրենսդրական կարգավորումը և առկա թերությունները» թեմայով քննարկմանը նիստի բոլոր մասնակիցները՝ հանձնաժողովի նախագահ Մարտուն Գրիգորյանից սկսած, կարևորում էին կենդանինների պաշտպանությունը, նրանց հանդեպ պատշաճ վերաբերմունքը և այն, որ պետք է ամեն ինչ անել կենդանիներին հնարավոր խոշտանգումներից ու շահագործումից զերծ պահելու համար: ՀՀ բնապահպանության նախարար Արամայիս Գրիգորյանի հրամանով ստեղծված աշխատանքային խումբն էլ ներկայացրեց նախատեսվող այն օրենսդրական փոփոխությունների փաթեթը, որով կլուծվեն ոլորտում առկա օրենսդրական խնդիրները: Հանձնաժողովի նախագահ Մարտուն Գրիգորյանից Araratnews.am-ը հետաքրքրվեց՝ ինչպես է ստացվում, որ ստանձնելով կենդանիների պաշտպանի դերը, ինքը, սակայն, մի առիթով պարծեցել է, որ իր շները շնամարտի են մասնակցում:
«Չկա նման բան, ես էդպիսի բան չեմ ասել, դա բամբասանք է, քաղաքապետի ընտրությունների հետ կապված շահարկումներ են» ,- պնդեց Մարտուն Գրիգորյանը:
—Ի՞նչ կենդանիներ եք պահում:
-Ձի և ցուլ:
-Իսկ շո՞ւն:
-Իհարկե, շուն էլ ունեմ, մեկ շուն, մեկ ձի ու մեկ ցուլ:
-Պատգամավորների կողմից առաջարկ եղավ արգելել սեփական քմահաճույքի համար կենդանիներ պահել՝ այդպես զերծ մնալով նաև կենդանիներին շահագործելուց:
-Պետք է իրավիճակային քննարկում լինի ու հասկանանք՝ ինչ նպատակով և պայմաններում է պահվում: Եթե նորմալ պայմաններում են պահվում և այդ կենդանիների շնորհիվ ինչ-որ տեղ էլ բիզնեսը զարգանա, ի՞նչ է եղել, թող պահեն:
-Բայց դա չի՞ նշանակում կենդանիների շահագործում:
-Եթե էդպես նայենք, գազանանոցում էլ, որ մարդիկ գալիս տեսնում են ու վճարում, էդտեղ էլ բիզնես կա, չէ՞:
-Այսինքն՝ նորմա՞լ եք համարում, որ կենդանուն օգտագործեն սեփական բիզնեսը զարգացնելու համար:
-Էս պահի դրությամբ ես սկզբունքորեն խնդիր չեմ տեսնում: Եթե քննարկումների արդյունքում հանգենք այն մտքին, որ չի կարելի, արգելենք, ես կողմ եմ. խնդիր չկա:
