Երեւանի Քանաքեռ-Զեյթուն վարչական շրջանի թիվ 16 պոլիկլինիկայում գործադուլ է: Այս մասին Araratnews.am-ը տեղեկացավ Երեւանի ավագանու «Ելք» խմբակցության ղեկավար Դավիթ Խաժակյանից:
Օրեր առաջ «Ելք» խմբակցության պահանջով պաշտոնանկ արվեց թիվ 16 պոլիկլինիկայի տնօրեն Մարինա Ստեփանյանը, որը կեղծ հաստիքներ էր գրանցել ու 20.000 դրամ վերցրել աշխատակիցներից արձակուրդի համար:
Ավագանու անդամի խոսքով՝ բուժաշխատողները պահանջում են տնօրենի ժամանակավոր պաշտոնակատար նշանակել Լենա Հովսեփյանին, սակայն Երեւանի քաղաքապետարանը մերժել է նրանց պահանջը: «Քաղաքապետարանն իր թեկնածուին՝ սոնոգրաֆիստին է ներկայացնում թիվ 16 պոլիկլինիկայի աշխատակիցներին: Եթե լինի այդ կամ այլ թեկնածու, ավելի վատ կլինի իրավիճակը: Այսպես են ասել պոլիկլինիկայի աշխատակիցները»,-մանրամասնեց «Ելքի» ներկայացուցիչը:
Դավիթ Խաժակյանի խոսքով՝ Երեւանի քաղաքապետարանի առողջապահության վարչության պետը պոլիկլինիկայում է, սակայն Խաժակյանին հայտնի չէ, թե ինչ պարզաբանումներ է ներկայացնում: «Մենք վաղը ավագանու նիստում այս հարցը բարձրաձայնելու ենք»,- հավատացրեց Երեւանի ավագանու «Ելք» խմբակցության ղեկավարը:
Սոնա Դավթյան
