Ամերիկացի լրագրող Դևիդ Սեթերն առաջիկայում չի կարող այցելել Ռուսաստան, քանի որ այդ երկրի իշխանությունները նրան անցանկալի անձ են համարել՝ մերժելով մուտքի արտոնագիր տրամադրել նրան։ Այս մասին գրում է The Guardian-ը։
Սեթերն աշխատում է The Financial Times հեղինակավոր պարբերականում։ Լրագրողը վերջերս այցելել է Կիև, քանի որ լրացել է Ռուսաստանում նրա մուտքի արտոնագրի ժամկետը։ Սեթերը դիմել է Կիևում ՌԴ դեսպանատուն, սակայն մերժվել է պատճառաբանությամբ, որ նրա մուտքը Ռուսաստան անցանկալի է։
Մերժման հիմքը տրամադրել է Ռուսաստանի անվտանգության դաշնային ծառայությունը։ Ամերիկյան դեսպանատունը պահանջել է բացատրել այս որոշումը, սակայն ռուսական իշխանությունները հրաժարվել են դա անել։
Դևիդ Սեթերը հայտարարել է, որ ինքը հասնելու է նրան, որպեսզի այս արգելքը վերացվի։ Նույն պարբերականը գրում է, որ լրագրողների արտաքսումը սովորական բան էր ԽՍՀՄ-ում և բնորոշ է «սառը պատերազմի» ժամանակներին։
