Երեկ քաղաքապետ Տարոն Մարգարյանն աշխատանքից ազատեց քաղաքապետարանի հանրակրթության վարչության պետ Գայանե Սողոմոնյանին, որը «Ծառուկյան» դաշինքի շտաբի պետ, պատգամավոր, ՎՊ նախկին նախագահ Իշխան Զաքարյանի կինն է:
Այս կապակցությամբ «Ժամանակ» օրաթերթը գրել էր, որ ԲՀԿ ղեկավար Գագիկ Ծառուկյանն է իբր նախագահ Սերժ Սարգսյանին խնդրել աշխատանքից հեռացնել Գայանե Սողոմոնյանին:
Գագիկ Ծառուկյանի մամուլի խոսնակ, ԱԺ պատգամավոր Իվետա Տոնոյանը ստոր սուտ համարեց տարածվող տեղեկատվությունը: Նա մեզ հետ զրույցում ասաց, որ Գայանե Սողոմոնյանն ինքն է ասել, թե ինչու է դուրս եկել աշխատանքից և մնացած վարկածները զուտ զրպարտություն են, որը որոշ լրատվականների մոտ արդեն ժանր է դարձել:
Հետաքրքիր է, որ լրատվականը նման ապատեղեկատվություն տարածելով հաշվի չի առել այն հանգամանքը, որ Իշխան Զաքարյանը՝ Գագիկ Ծառուկյանի թիմակիցն է և դժվար է պատկերացնել, որ Ծառուկյանը կգնա նման քայլի: Եվ հետո դժվար է պատկերացնել, որ երկրի նախագահը և խորհրդարանում իր մեծությամբ երկրորդ քաղաքական ուժի ղեկավարները կարող են քննարկել քաղաքի հանրակրթության վարչության պետին աշխատանքից ազատելու հարցը:
