ՀՀ Կառավարությունն այսօրվա նիստի ժամանակ որոշեց ձեռնպահ մնալ «Ծառուկյան» խմբակցության մի քանի պատգամավորների ներկայացրած «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» Հայաստանի Հանրապետության օրենքում փոփոխություն կատարելու մասին» ՀՀ օրենքի նախագծի վերաբերյալ առաջարկությանը:
Արդարադատության նախարար Դավիթ Հարությունյանը նշեց, թե խոսքը վարձակալությամբ տրված մեքենաներին է վերաբերում: Նա նշեց, որ պատգամավորների ներկայացրած առաջարկը Վարչական իրավախախտումների մասին նոր օրենսգրքում կարգավորված է, և քանի որ օրերս Ազգային ժողովում ներկայացվելու է նոր օրենսգիրքը, առաջարկեց ձեռնպահ մնալ:
Նշենք, որ պատգամավորների ներկայացրած տեղեկանքի մեջ ասվում է, որ սույն փոփոխության տրամաբանության հիմքում դրված է այն պարզ ճշմարտությունը, որ իրավաբանական անձը կամ անհատ ձեռնարկատերը չի կարող ենթարկվել պատասխանատվության այն դեպքում, երբ իրավախախտում չի կատարել: Համաձայն գործող օրենքի՝ տրանսպորտային միջոցը վարձույթ տալու գործունեությամբ զբաղվող իրավաբանական անձինք կամ անհատ ձեռնարկատերերը պարտավոր են վճարել իրավախախտում կատարած անձի փոխարեն, եթե մեկ ամսվա ընթացքում իրավախախտում կատարած անձը, նույն ինքը ՝վարձակալը, չի վճարում վարչական ակտի գումարը: Սա արդեն ինքնին հանդիսանում է մարդու իրավունքների խախտում: Այսինքն` ապացուցելով նույնիսկ, որ իրավախախտում կատարողը տվյալ իրավաբանական անձը կամ անհատ ձեռնարկատերը չէ, միևնույն է` մեկ այլ օրենքով նրա վրա է դրվում վարչական ակտի վճարման պարտականությունը: «Մինչդեռ օրենքները մշակելիս և ընդունելիս պետք է հնարավարություններ ստեղծենք մանր և միջին ձեռնարկատիրության զարգացման համար, որոնց թվին են դասվում նաև տրանսպորտային միջոցները վարձույթ տալու գործունեությամբ զբաղվող կազմակեպությունները, նպաստենք, այլ ոչ թե սահմանափակենք նրանց գործունեության ընդլայնումը»:
