Տաջիկստանում արգելվել է դպրոցների շրջանավարտների ավանդական «Վերջին զանգ» միջոցառումների անցկացումը, որը երկրում կոչվում է «Հասունության զանգ», հայտնում է Korrespondent-ը:
Միջինասիական այդ երկրի կրթության և գիտության նախարար Նուրիդին Սաիդը հրամանագիր է ստորագրել, որում ասվում է, որ երկրի բոլոր դպրոցներում տարվա վերջին ուսումնական օրը՝ հունիսի 7-ին, տոնակատարությունների փոխարեն դասեր են անցկացվելու:
«Արգելել հանրապետության բոլոր հանրակրթական դպրոցներում 9 և 11 դասարանների շրջանավարտների համար «Հասունության զանգի» անցկացումը»,- ասվում է հրամանագրի մեջ:
Նշենք, որ մի քանի տարի առաջ դպրոցների ջեռուցման հետ կապված խնդիրների պատճառով Տաջիկստանում որոշում է կայացվել դասերի մեծ մասը տեղափոխել ամառ: Դրա հետևանքով ձմեռային արձակուրդները տևում են ոչ թե երկու շաբաթ, այլ մեկ ամիս:
