Հոկտեմբերի 17-ին Արագածոտնի մարզպետարանում տարածքային կառավարման եւ զարգացման նախարարի պաշտոնակատար Սուրեն Պապիկյանը ներկայացրեց Արագածոտնի մարզպետ Դավիթ Գեւորգյանին:
Նախարարի պաշտոնակատարը շնորհավորեց նորանշանակ մարզպետին: Այս նշանակումը նա կարեւորեց նրանով, որ նոր Հայաստանում նոր իրողություններ են ձեւավորվել, եւ Դավիթ Գեւորգյանը կանգնած է եղել թավշյա հեղափոխության ակունքներում՝ ունենալով նոր Հայաստանի իր հստակ տեսլականը:
«Դավիթ Գեւորգյանը տարածքային կառավարման եւ զարգացման փոխնախարար է եղել, եւ այդ ընթացքում նրա մասին միայն դրվատանքի խոսքեր կարող եմ ասել,-ասաց նախարարի պաշտոնակատարը»,-իր առջեւ դրված խնդիրներին նա մոտեցել է պատասխանատվությամբ եւ հետեւողականորեն հասել դրանց լուծման տրամաբանական ավարտին:
Սուրեն Պապիկյանը շնորհակալություն հայտնեց նախորդ մարզպետ Աշոտ Սիմոնյանին եւ հաջողություններ մաղթեց նորանշանակ մարզպետին: Նա վստահություն հայտնեց, որ երիտասարդական ավյուն ունեցող մարզպետը լինելու է օրինականության եւ արդարության պահպանման ջատագովը եւ մարզպետարանի աշխատակազմին ու մարզային կառույցների, տեղական ինքնակառավարման մարմինների ղեկավարներին հորդորեց միասնական լինել եւ նպաստել Արագածոտնի մարզի զարգացմանը:
Մարզպետ Դավիթ Գեւորգյանը շնորհակալություն հայտնեց վարչապետի պաշտոնակատար Նիկոլ Փաշինյանին, ՏԿԶ նախարարի պաշտոնակատար Սուրեն Պապիկյանին եւ ողջ քաղաքական թիմին՝ իրեն ցուցաբերած վստահության համար եւ հավաստիացրեց, որ պատրաստ է գիշեր ու զօր աշխատել՝ մարզում կուտակված խնդիրները լուծելու համար: Նա նշեց, որ ինչպես այլ մարզերում, այստեղ էլ խնդիրները երկու մասի են՝ արդարության եւ օրինականության հաստատում եւ սոցիալ-տնտեսական վիճակի բարելավում:
«Վստահ եմ, որ երկու մասով էլ մարզպետարանը էական անելիքներ ունի»,-ասաց Դավիթ Գեւորգյանը եւ հավաստիացրեց, որ համատեղ լուծելու են իրենց առաջադրված խնդիրները, եւ թավշյա հեղափոխությունից մեծ ակնկալիքներ ունեցող հասարակությունը հուսախաբ չի լինելու:
