Ստամբուլի ոստիկանության պարեկապահակետային վարչության պետ Թայֆուն Քարալին փողոցում ծեծել է ծառայության ընթացքում խախտում թույլ տված աշխատակցին:
Փողոցում տեղադրված տեսախցիկները արձանագրել են, թե ինչպես է վարչության պետը իր մոտ կանչում ծառայություն իրականացնող ոստիկանին, բոլորի ներկայությամբ գոռում վրան, վիրավորական խոսքեր ասում, ապա մի քանի անգամ ապտակում: Բռնության ենթարկված ոստիկանը մի քանի քայլ գնալուց հետո կորցնում է գիտակցությունն ու վայր ընկնում: Ծառայակիցները նրան շտապ տեղափոխում են հիվանդանոց:
Թուրքական Hürriyet թերթի տեղեկացմամբ՝ տեսանյութը մեծ աղմուկ է բարձրացրել սոցցանցերում: Դժգոհության մեծ ալիքից հետո Twitter-ում հայտարարություն է արել Ստամբուլի քաղաքապետ Մևլութ Ույսալը՝ կատարվածը ցավալի և ամոթալի անվանելով: Ույսալը հայտնել է, որ պարեկային վարչության պետին հեռացրել է զբաղեցրած պաշտոնից և հանձնարարել նրա նկատմամբ ծառայողական քննություն սկսել:
Աղբյուր` Ermenihaber.am
