ՀՀ աշխատանքի եւ սոցիալական հարցերի նախարար Արտեմ Ասատրյանի պնդմամբ` մեծ ծավալի աշխատանքներ են տարվել` ապրիլյան պատերազմի օրերին զոհված զինծառայողների ընտանիքներին օգնելու ուղղությամբ: «Այս ընթացքում օժանդակություն ցուցաբերվել են թե՛ պետական մարմինների, թե՛ տեղական ինքնակառավարման մարմիների, թե՛ տարբեր կազմակերպությունների եւ սովորական քաղաքացիների կողմից, սակայն խնդիրն ունի համակարգային լուծման կարիք»,- լրագրողներին ասաց նախարարը:
Հետևաբար, նախարարն ասաց` իրենց կողմից կատարված ուսումնասիրությունների եւ վարչապետի առաջարկությունների հիման վրա գրավոր հանձնարարականներ կտրվեն բոլոր պատկան մարմիններին` իրենց գործառույթների եւ ծրագրերի շրջանակներում խնդիրներին լուծում տալու նպատակով: Բացի դա` նախատեսվում է լիարժեք կերպով գործարկել սոցիալական աշխատողի ինստիտուտը:
«Մենք վերջին տարիներին իրականացնում ենք սոցիալական ծառայությունների համակարգի ներդրման աշխատանքները, որը ենթադրում է յուրաքանչյուր խնդիր ունեցող ընտանիքի կարիքի գնահատում եւ գնահատված կարիքի հիման վրա թե՛ պետական, թե՛ ոչ պետական ռեսուրսների համակարգված նեգրավմամբ խնդիրների համապարփակ լուծում»,- պարզաբանեց Արտեմ Ասատրյանը: Լրագրողի հարցին` ինչպե՞ս է ստացվել, որ զոհված զինծառայողների մեծ մասը սոցիալապես անապահով ընտանիքներից են, նախարարն ասաց. «Ես չեմ կարծում, որ իրավիճակն այդպիսին է, մեր բոլոր-բոլոր ընտանիքների զավակներն էլ իրենց պարտքը կատարում են իրենց հայրենիքի հանդեպ»:
Նախարարը, չնայած չկարողացավ անուններ նշել, բայց վստահեցրեց` գիտի բազմաթիվ պետական պաշտոնյաների որդիների, որոնք ծառայում են հայոց բանակում:
Առավել մանրամասն` տեսանյութում:
Շողիկ Գալստյան
