Ռեժիսոր, դերասանուհի Նադի Իսպիրյանը, պարզվում է, ակտիվ ստեղծագործական գործունեություն է ծավալում Մոսկվայի հայկական թատրոնում: Ararartnews.am-ը դերասանուհուց տեղեկացավ, որ առաջիկայում թատրոնում հայերենով կբեմադրվի դրամատուրգ Կարինե Խոդիկյանի «Սիրային քառանկյունի» պիեսը: Թատրոնի գեղարվեստական ղեկավարը Սլավա Ստեփանյանն է, բեմադրող ռեժիսորը՝ Նելլի Շահբազովան:
Աջից Սլավա Ստեփանյանն է, նրա կողքին՝ Նադի Իսպիրյանը, ձախից՝ Նելլի Շահբազովան:
Ներկայացման պրեմիերան կլինի սեպտեմբերին: Թատրոնի ղեկավարությունը ցանկանում է հետագայում ներկայացումը բեմադրել Հայաստանում եւ այլ երկրներում:
«Սիրային քառանկյունին» մի տղամարդու մասին է, որը ունի կին, սիրուհի, որից էլ թաքուն եւս մեկ սիրուհի: 6 տարվա սիրուհուն տղամարդը դավաճանում է մեկ այլ՝ տարիքով փոքր սիրուհու՝ Նինիի հետ, որին էլ մարմնավորում է Նադի Իսպիրյանը: «Ներկայացման իմաստն այն է, որ տղամարդը, իր կյանքում ունենալով 3 կին, նրանց բնավորության լավ գծերը համադրելով, կերտում է իդեալական կնոջ կերպար»,- մանրամասնեց դերասանուհին:
Նինիի կերպարը հետաքրքրել է Նադի Իսպիրյանին, քանի որ նա ազատ, թեթեւ, անկեղծ, «դուխով», խելացի մի աղջիկ է: «Չնայած ռուսերեն խոսում եմ առանց ակցենտի, սակայն ռեժիսորին դուր եկավ, երբ ես Նինիին ներկայացրի հայավարի: Կերպարն ինձ մոտ է իր «դուխով» եւ անմիջականությամբ»,- անկեղծանում է դերասանուհին:
Նադի Իսպիրյանն առաջին անգամ է խաղալու թատրոնում, որի մթնոլորտը գրեթե ամեն տեղ՝ բոլոր երկրներում, նույնն է:
Մոսկվայի հայկական թատրոնի ակտիվ գործունեությունը չի վրիպել Մոսկվայի քաղաքապետ Սերգեյ Սոբյանինի աչքից: Թատրոնի գեղարվեստական ղեկավար Սլավա Ստեփանյանին ակտիվ հասարակական գործունեության եւ Մոսկվայի զարգացման համար պարգեւատրել է շնորհակալագրով:
Չնայած Նադի Իսպիրյանը ավելի շատ կինոռեժիսոր է ( hայ հանդիսատեսը կհիշի նրա «Պապարացի» ֆիլմը), «Մոսկվայի հայկական թատրոնում ռուսերենով բեմադրելու է «Գիքորը»՝ Հովհաննես Թումանյանի գործերից մեկը: « Մեծ պատասխանատվություն է Թումանյանի գործերին անդրադառնալը: Սցենարը գրելիս զգույշ եմ եղել, որ ավելի կամ պակաս բան չլինի: Պարզապես «Գիքորի» կերպարն եմ մի քիչ շատախոս ու երազկոտ դարձրել մինչեւ քաղաք գալը: Կարծում եմ՝ Ռուսաստանում ապրող մեր հայրենակիցները կարոտած կլինեն: Չի բացառվում՝ «Գիքորը» ներկայացնեմ նաև Հայաստանում»,- ասաց ռեժիսոր, դերասանուհի Նադի Իսպիրյանը:
Մեր հայրենակցի հաջողություններն այսքանով չեն ավարտվում: Նա ռուսական այլ նախագծերում եւս նկարահանվել է, որոնց, թերեւս, կանդրադառնանք մեր հաջորդ հոդվածներում:
Սոնա Դավթյան
