Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը դիմել է ՀՀ գլխավոր դատախազին՝ Սերժ Սարգսյանին հարցաքննելու պահանջով: Araratnews.am-ի հետ զրույցում Սաքունցը նշեց, որ դիմումը էլեկտրոնային տարբերակով է ուղարկել, այն ուղարկելու է նաեւ փոստային առաքման միջոցով: Արթուր Սաքունցը գլխավոր դատախազությունից պահանջում է հարցաքննել Սերժ Սարգսյանին՝ կապված Արամ Սարգսյանի հայտարարության հետ: Հիշեցնենք, որ Արամ Զ. Սարգսյանն «Առաջին լրատվական»-ի լրատվական թողարկման ժամանակ, խոսելով հոկտեմբերի 27-ի ոճրագործության մասին, ասել է, որ ժամանակին Սերժ Սարգսյանն իրեն խոստովանել է, թե հոկտեմբերի 27-ը կազմակերպված է ու մի օր կասի, թե ով էր կազմակերպել։
«Պահանջում եմ հարցաքննել, իրավական գնահատական տալ հրապարակված նյութում նշված փաստին, հարցաքննել Սերժ Սարգսյանին եւ Արամ Զ. Սարգսյանին»,- ասաց Սաքունցը: Նրա խոսքով, փաստացի, Սերժ Սարգսյանը տիրապետում է այդ տեղեկատվությանը, եւ, ըստ քրեական դատավարության, նա պետք է հարցաքննվի: Հարցին, թե արդյոք դատախազ Կոստանյանը կգնա՞ այդ որոշմանը, Սաքունցը նշեց, թե ինքը խոսում է ըստ օրենքի: «Համապատասխան հոդված կա մարդկանց կյանքի կամ առողջության համար վտանգավոր հանգամանքների վերաբերյալ տեղեկությունները թաքցնելու մասին: Եթե այդ արարքները կատարվել են պաշտոնական դիրքն օգտագործելով, ուրեմն տարբեր բաներ կան՝ նվազագույն աշխատավարձի 300 – 500 պատիկի, կամ 2-6 տարի ազատազրկման ժամկետով, եւ միաժամանակ որոշակի պաշտոններ զբաղեցնելու, կամ գործունեությամբ զբաղվելու իրավունքից զրկելով մինչեւ երեք տարի ժամկետով»,- ասաց իրավապաշտպանը:
