«Իմ տեղեկատվության աղբյուրը մամուլն է: Այս կասկածյալները, ըստ մամուլի, դրանք քաղաքական խնդիր են դրել, իշխանափոխություն, հեղափոխություն անել՝ իշխանությունը փոխել: Հիմա ես կարծում եմ, որ դա քաղաքական է, քրեական չէ: Իսկ իշխանությունը նույնպես քաղաքական խնդիր է լուծում, եւ իր ռեսուրսներով պայքարում է նրանց դեմ»,- անդրադառնալով Նորք- Մարաշի հայտնի ձերբակալությանը, նշեց ԳԽ նախկին պատգամավոր Ազատ Արշակյանը:
Հիշեցնենք, որ նախորդ տարեվերջին՝ նոյեմբերի 25-ին Նորք- Մարաշում ձերբակալվեցին զինված խմբավորման անդամներ, ովքեր ըստ ԱԱԾ-ի, պատրաստվում են իրակացնել զինված գործողություններ: Որոշ ԶԼՄ-ներ էլ հրապարակեցին, թե խմբավորման անդամները նախատեսում էին հարձակումներ իրականացնել բարձրաստիճան պաշտոնյաների նկատմամբ: Ազատ Արշակյանի խոսքով՝ միեւնույն ժամանակ ինքն ունի վստահության պակաս իշխանությունների եւ նրանց գործողությունների նկատմամբ, եւ, հետեւաբար, միանշանակ չի կարող պնդել, որ այդ ամենը իրականությանը համապատասխանում է: Նա հիշեցրեց, որ ինքը դատապարտվել է չորս անգամ, եւ տարիներ անց արդարացվել է, եւ իրենից ներողություն են խնդրել:
Ինչ վերաբերում է այն հրապարակումներին, թե զինված խմբավորման անդամները պատրաստվում էին պայթեցնել Սերժ Սարգսյանի ինքնաթիռը, ապա Արշակյանն ասաց, թե դա անհեթություն է: «Ի՞նչ է, նրանք Սերժ Սարգսյանի՞ն են ասել: Ու՞մ են դա ասել՝ քննիչի՞ն, իրար մեջ են քննարկել են, հետո Սերժ Սարգսյանն իմացել է, թույլ չի՞ տվել. դա առասպել է, հեքիաթ: Նախ, նման արտահոսքեր չպետք է լինեն, եթե իհարկե կասկածյալները նման բան չեն տարածում»:
Հիշեցնենք, որ տարեվերջին ՀՀ Ազգային անվտանգության ծառայության և նույն ծառայության հակաահաբեկչական (Ալֆա) վարչության և Ոստիկանության կազմակերպված հանցավորության դեմ պայքարի գլխավոր վարչության աշխատակիցների իրացրած գործողությունների արդյունքում ձերբակալված եւ արդեն կալանավորված զինված հանցախմբի անդամներից եւ ոչ մեկը չի ընդունել իրեն առաջադրված մեղադրանքը: Դեռեւս շարունակվում են ձերբակալությունները։ Ներկայումս ձերբակալվածների թիվն անցնում է շուրջ երկու տասնյակը:
