ԱԺ «Ժառանգություն» խմբակցության պատգամավոր Թևան Պողոսյանը նոր Ընտրական օրենսգրքին ծանոթ է մամուլից: Araratnews.am-ի հետ զրույցում խոսելով հրապարակված օրենսգրքից, Պողոսյանն ասաց, թե առայժմ չի պատրաստվում նայել: «Նույնիսկ կառավարության նիստի քննարկման ժամանակ, երբ որ ասեցին որ տեսքտերը մի քիչ տարբերվում են, այն ինչ –որ ուղարկվել է այստեղ: Չեմ ուզում ունենալ նույն այն զգացողությունները, ինչ-որ սահմանադրության տեքստի քննարկման ժամանակ. տարբեր տեքստերի խնդիրներ էին առաջանում»,- ասաց պատգամավորը, հավելելով, որ երբ Ընտրական նոր օրենսգիրքը բերվի խորհրդարան՝ ինքն անպայման կուսումնասիրի:
Թևան Պողոսյանն ասաց, թե այն դրույթները, որոնք հայտնվել են մամուլում, ինքը ամեն դեպքում կարդացել է, ու կարծում է, որ պետք է լրջագույնս քննարկել, որպեսզի վստահություն լինի: «Կառավարության մոտեցումը, ըստ իս, ինչ-որ չափով յուրահատուկ է լինելու, կբերեն ինչ-որ դրույթներ, որոնք կբերեն ու քննարկումների ժամանակ մեր առաջարկները կընդունեն, հետո կասեն, թե ձեր առաջարկությունները ընդունել ենք, բայց պետք է շատ մանրամասն նայենք այն դրույթները, որոնք չեն համապատասխանում: Չպետք է մոռանանք, որ սատանան մանրունքներում է թաքնված»,- մեզ հետ զրույցում նշեց Թևան Պողոսյանը:
Այլ կերպ ասած, ըստ պատգամավորի, պետք է խորը ուսումնասիրել: Հիմա կարող է ասել, որ տեքստին կծանոթանա այն ժամանակ երբ հասնի խորհրդարան, որպեսզի հասկանա, թե հատկապես որ դրույթների վրա պետք է ուշադրություն դարձնել:
Հիշեցնենք, որ Վենետիկի հանձնաժողովի կայքում հրապարակվել է Հայաստանի Հանրապետության նոր Ընտրական օրենսգրքի նախագիծը անգլերեն տարբերակով: Ինչպես նշված է նախագծում, Ազգային ժողովը, տեղական ինքնակառավարման մարմինները, բացի Երևանի, Գյումրիի և Վանաձորի ղեկավարներից, պետք է ընտրվեն ուղղակիորեն ընտրողների կողմից:
Կենտրոնական ընտրական հանձնաժողովը պետք է բաղկացած լինի յոթ անդամից: Հանձնաժողովի նախագահը և մյուս անդամները պետք է ընտրվեն Ազգային ժողովի պատգամավորների ընդհանուր քանակի ձայների առնվազն երեք հինգերորդի կողմից՝ վեց տարի ժամկետով: Նույն մարդը չի կարող ընտրվել Կենտրոնական ընտրական հանձնաժողովի անդամ, այդ թվում նաև նախագահ՝ ավելի քան երկու հաջորդական ժամկետներով:
Ինչպես նշված է Ընտրական օրենսգրքի նախագծում, Ազգային ժողովի պատգամավորների քանակը պետք է լինի նվազագույնը 101:
Ազգային ժողովի ընտրությունների ժամանակ պետք է ստեղծվի 13 ընտրատարածք՝ 4-ը Երևանում, 9-ը՝ մարզերում:
