Սարգսյանը՝ Վայոց ձորի «բդեշխի» ցանկության եւ գյուղաբնակների բողոքի մասին

Araratnews.am-ի զրուցակիցն է Վայոց ձորի մարզպետ Հարություն  Սարգսյանը:

Պարո՛ն Սարգսյան,  Ջերմուկ քաղաքում արտահերթ ընտրություննե՞ր են տեղի ունենալու:

Չգիտեմ, նման բան չկա:

Խոսակցություններ կան, որ Վայոց ձորի «բդեշխ», ՀՀԿ-ական պատգամավոր Աշոտ Արսենյանի որդին  ցանկանում  է քաղաքապետ դառնալ:

Երբ որ առաջադրում լինի, այդ ժամանակ կիմանանք, ես  հիմա ի՞նչ իմանամ` ցանկություն ունի՞, թե՞ ոչ: Վարչատարածքի փոփոխություն երբ որ լինի, եւ եթե լինի, օրենքով սահմանված կարգով ընտրությունը եթե լինի, առաջադրումների ժամանակ պարզ կլինի, թե ովքե՛ր են թեկնածուները, բայց դա ընդամենը դեռ խոսակցություն է:

Դո՞ւք էլ եք փաստորեն լսել, որ Արսենյանի որդին քաղաքապետ դառնալու ցանկություն ունի:

Դրանք ընդամենը խոսակցություններ են: Կարծիքներ են, դա օրենքով սահմանված կարգով պետք է լինի:

Նշվում է, որ իշխանությունները մտադիր են մարզի Գնդեվազ, Հերհեր, Կարմրաշեն համայնքներն առանձնացնել Ջերմուկի ձախ ափից ու Կեչուտից։  Դուք ինքներդ կո՞ղմ եք նման  բաժանման, քանի որ այդ համայնքները վերջերս էին միավորվել:

Սա քարացած օրենք չէ, տեսնում ենք` միգուցե ինչ-որ տեղ թերի բան ենք արել, սա չի կարելի, այս կարգով էղել է ու վերջ:

Իսկ ի՞նչ ընթացք ստացավ Վայոց ձորի մարզի Շատին եւ Արենի համայնքների բնակիչների բողոքի ակցիաները: Գյուղաբնակները չէին ընդունում ՏԻՄ ընտրությունների արդյունքները: 

Ակցիաներ էին կազմակերպել, բողոքարկում էին ընտրությունների արդյունքները: Այս պահին ժողովուրդը հանգիստ է:

Հարցազրույցը՝ Փայլակ Ֆահրադյանի