Այսօր լրագրողների հետ հանդիպման ժամանակ ՍԱՊԾ անասնաբուժության տեսչության պետ Հովհաննես Մկրտչյանը պարզաբանեց հանրապետությունում խուճապ առաջացրած կենդանիներին հատուկ դաբաղ հիվանդության մասին լուրը,ինչի պատճառով դադարեցվել է Հայաստանից դեպի Ռուսաստան այն մթեքների արտահանումը, որոնց մեջ հնարավոր է լինի դաբաղ հիվանդությունը:
Մկրտչյանի խոսքով՝ դաբաղ հիվանդության այս տիպը փոխանցվում է շատ արագ, օդակաթիլային ճանապարհով.«Դեռ անցյալ տարվա նոյեմբերի 15-ից սկսած հարևան պետությունում՝ Թուրքիայում գրանցվեցին դաբաղ հիվանդության դեպքեր, այդ մասին Հայաստանի Հանրապետությունը տեղեկացրեց «Կենդանիների առողջության համաշխարհային կազմակերպությանը»: Իրավիճակը վերլուծելու համար սպասեցինք Թուրքիայի հանարապետությունից հիվանդության հարուցիչի վերջնական լաբորատոր փորձաքննության պատասխանին, որովհետև գիտական վարկած կար, որ դաբաղ հիվանդությունը կարող է փոխանցվել 200 կմ հեռավորության վրա. քամին կարող է այդ վարակը փոխանցել: Հիվանդությունը Հայաստանի համար, համենայն դեպս, էկզոտիկ տիպ է»:
Բանախոսի հավաստմամբ՝ Հայաստանում դաբաղ հիվանդության դեպք է գրանցվել է 2015 թվականի նոյեմբերին, Արմավիրի մարզում.«Դեպքի բացահայտումից հետո արագ իրականացվել են նմուշառման աշխատանքներ, որից հետո ոչնչացման և թաղման աշխատաքները: Հիվանդության հնարավոր տարածումը կանխելու համար մրցույթ ենք հայտարարել, որպեսզի ներմուծենք նոր ենթատիպով պատվաստանյութը»:
Ինչ վերաբերում է Հայաստանից դեպի այլ երկրներ արտահանման արգելքներին՝ Մկրտչյանը նշեց.«Ռուսաստանից հաղորդագրություն է եկել, որ ժամանակավորապես արգելվել է որոշակի ապրանքատեսակների մուտքը Ռուսաստան՝ մինչև կհասկանան հիվանդությունը տարածում կունենա, թե՝ ոչ: Համաձայն գրության՝ ժամանակավորապես արգելվել է կենդանի կենդանիների մուտքը Ռուսասատանի Դաշնություն՝ այն կենդանիների, որոնք կարող են վարակվել այս հիվանդությամբ, արգելվել է այդ կենդանիներից ստացված գենետիկական նյութը, միսը և ենթամթերքը, այն էլ այն միսն ու ենթամթերքը, որը չի անցել այնպիսի մշակում, որպեսզի բացառվի վարակի առկայությունը, կաթնամթերքը, որը չի անցել ջերմային մշակում, և կենդանական ծագման հումքը՝ կաշի, փետուր, աղվամազ և այլն»:
Իսկ թե ինչո՞ւ են Հայաստանում գրանցված դաբաղ հիվանդության մասին մարդիկ տեղեկանում ռուսական լրատվամիջոցներից, բանախոսը պատասխանեց.«Որովհետև մենք հիվանդ կենդանի չունեինք: Ունեցել ենք երկու խոզի, մեկ խոշոր եղջերավոր անասունի դեպք, որը եղել է 2015 թվականին ծնված և կաթ չէր տալիս: Եվ այդ բոլոր հիվանդ կենդանիները ոչնչացվել և թաղվել են: Այդ մասին նաև չենք խոսել, որովհետև երեկվա հրապարակումները հնարավորինս արդեն խոչընդոտել են կենդանի մանր եղջերավորների և խոշոր եղջերավորների արտահանման աշխատանքներին»:
Վերջում հավելենք, որ բանախոսի հավաստմամբ՝ հիվանդությունը մարդուն չի կարող անցնել հիվանդ կենդանու հետ շփումից և մսից:
