«Շինարարների միությունը երկար տարիներ խնդիրը բարձրացրել է, թե ինչու կա վաստակավոր բժիշկ, լրագրող և այլն, բայց չկա շինարար»: Ասաց ՀՀ քաղաքաշինության նախարար Նարեկ Սարգսյանը՝ պատասխանելով այն հարցին, թե ում գաղափարն է շինարարներին «Վաստակավոր շինարարի» կոչում տալու նախագիծը: Մեր հարցին, թե հնարավոր է Հայաստանում եկեղեցի կառուցողներին ևս վաստակավորի կոչում տան, քաղշիննախարարն արձագանքեց. «Ոչ, խնդիրը նրանում է, որ պետք է խոսենք ընդհանրապես վաստակավորների ինստիտուտը վերացնելու մասին, բայց եթե կա այդ ինստիտուտը, ապա նրանց պահանջը արդարացի է»:
Մեր հաջորդ հարցին, թե օրինակ Սամվել Ալեքսանյանը Փակ շուկան է կառուցել, հնարավո՞ր է համալրի վաստակավոր շինարարների շարքը, Նարեկ Սարգսյանը նշեց, որ խոսքը վերաբերում է որակավորում ունեցող շինարարներին: Ալեքսանյանը միևնույն է վաստակավորի կոչում չի ստանա, չնայած այն հանգամանքին, որ Փակ շուկայի դիմաց հավաքված նրա համակիրները վանկարկում էին «Ալեքսանյան շինարար»: Նարեկ Սարգսյանն ասաց, որ այդ կոչմանը չեն հավակնում նաև «խոպանչիները»: Ինքն էլ նրանց շարքում չէ, որովհետև ոչ թե շինարար է, այլ ճարտարապետ:
