ՀԱԿ-ի՝ խորհրդարանական ընտրությունների օրը փոխելու ստորագրահավաքին միացել է 19 պատգամավոր: Այս մասին ԱԺ ճեպազրույցների ժամանակ նշեց ԱԺ ՀԱԿ խմբակցության ղեկավար Լեւոն Զուրաբյանը:
Նա տեղեկացրեց, որ ստորագրահավաքին են միացել ՀԱԿ խմբակցության յոթ պատգամավորները, «Համախմբում» կուսակցությունից հինգ, ԲՀԿ-ից` երեք և «Ժառանգությունից» երկու պատգամավորներ: Ստորագրահավաքին միացել են նաեւ անկախ պատգամավորներ Խաչատուր Քոքոբելյանը եւ Էդմոն Մարուքյանը: «Չեմ կարծում, որ պետք է սպասել, որ ստորագրություններն ավելանալու են, ազդեցիկ ուժերի ներթափանցումը այս գործընթացի մեջ ցույց տվեց, որ պատշաճ թվով ստորագրություններ չհավաքվեցին: Սա կարեւոր քայլ էր, մեզ համար` սկզբունքային, որովհետեւ մենք ամբողջ հանրությանը ներկայացրեցինք այդ իրավական ակտի հակասահմանադրականությունը: Ակնհայտ է, որ այն պատգամավորները, ովքեր իրենց հորջորջում են ընդդիմադիր, չեն ստորագրել այս դիմումը, թող իրենք պատասխանեն հանրության հարցադրումներին»,- ասաց Զուրաբյանը:
Ինչ վերաբերում է ստեղծված իրավիճակին, ապա Զուրաբյանն ասաց, թե քառօրյա նիստը քննարկելն անիմաստ է, քանի որ քաղաքական ուժերը զբաղված են ընտրություններով, իսկ ԱԺ ղեկավարությունը խուսափում է խորհրդարան լուրջ հարցեր բերելուց: «Հիմնականում տեխնիկական հարցեր են, միակ նպատակն այն է, որ այս հնարքով զրկեն ընդդիմադիր գործիչներին ԱԺ խոսափողն ընտրություններից առաջ օգտագործելուց, սա իրենց հնարքն է, ոչինչ, մենք մեր ձեւը կգտնենք քարոզարշավի համար, ի վերջո, ինտերնետի դարում ենք ապրում»,- ասաց ՀԱԿ խմբակցության ղեկավարը:
Զուրաբյանը նշեց, որ իշխանություններն արդեն իսկ դիմում են խախտումների: Մասնավորապես, կան տեղեկություններ, որ արդեն սկսել են անձնագրային տվյալների լայնածավալ հավաքագրումը: «Ակնհայտ է, թե ինչի համար է դա արվում. դա արվում է, որ ընտրողների վրա գործադրվի ազդեցություն, բայց միեւնույն է, այն նվաճումները, որ մենք ունենք` ի դեմս ստորագրված ցուցակների հրապարակման եւ տեղամասերում տեսախցիկների տեղադրման, մենք ստեղծել ենք մի պատկեր, որ ուրիշի փոխարեն քվեարկողներ չեն լինի»,- ասաց Լեւոն Զուրաբյանը:
Նրա խոսքով` սկսվում են մեծ արշավ, մեծ պատերազմ` փողի, քաղաքական մտքի եւ արդարության միջեւ: «Սա է լինելու ԱԺ ընտրությունների ինտրիգը: Փողը եւ արդարությունը պատերազմելու են: Սա լինելու է ընտրություն մամոնայի եւ Աստծո միջեւ: Հիմա բոլորս կանգնած ենք այդ ընտրության առաջ»,- եզրափակեց Զուրաբյանը:
