ՌԴ նախագահ Վլադիմիր Պուտինը հայտարարել է, որ Ռուսաստանը ցանկանում է վերականգնել Թուրքիայի հետ հարաբերությունները և այդ առումով Անկարայից ակնկալում է կոնկրետ քայլեր, սակայն դրանք չկան, հայտնում է Ռիա Նովոստին:
Պուտինը նշել է, որ Ռուսաստանը Սիրիայում պատերազմում է ոչ թե կանոնավոր բանակի, այլ ահաբեկչական խմբավորումների դեմ:
«Եվ, իհարկե, մենք չենք մտածել այն մասին, որ թուրքական կործանիչը կարող է հարված հասցնել խոցման համար անպաշտպան մեր կործանիչին: Մենք չէինք պատրաստվում պատերազմել Թուրքիայի և թուրքական զինված ուժերի դեմ: Հակառակ դեպքում մենք կգործեինք այլ կերպ և այլ միջոցներով: Հուսով եմ, որ բանը դրան երբեք չի հասնի»,- ասել է նա:
Նրա խոսքերով` Ռուսաստանը Թուրքիայից ներողություն, ինչպես նաև վնասը փոխհատուցելու պատրաստակամության մասին հայտարարություն չի լսել:
«Մենք լսել ենք հայտարարություն հարաբերությունների վերականգման ցանկության մասին: Մենք նույնպես ցանկանում ենք վերականգնել հարաբերությունները: Մենք չենք դրանք վատացրել: Մենք արել ենք ամեն ինչ, որ տասնամյակների ընթացքում ռուս-թուրքական հարաբերությունները բարձրացնենք գործընկերության և բարեկամության աննախադեպ մակարդակի: Թե ինչի համար է դա արվել, ես մինչև այժմ չեմ հասկանում»,- ավելացրել է Պուտինը:
