ՌԴ արտգործնախարար Սերգեյ Լավրովն ու Լիբանանի վարչապետ Թամամ Սալամը քննարկել են Լիբանանի տարածքում սիրիացի փախստականների շուրջ տիրող վիճակը եւ քաղաքական դրությունը։ Այս մասին հայտնել են ՌԴ ԱԳՆ-ից։ Հանդիպումը կայացել է Անվտանգության հարցերով Մյունխենի կոնֆերանսի շրջանակներում, փոխանցում է ՏԱՍՍ-ը։
«Զրույցի ընթացքում տեղի է ունեցել Լիբանանում եւ Մերձավոր Արեւելքում իրավիճակի զարգացման շուրջ կարծիքների փոխանակում։ Ռուսական կողմը հաստատել է Լիբանանի ինքնիշխանությանը, միասնականությանը եւ տարածքային ամբողջականության պահպանմանը հավատարիմ մնալու իր դիրքորոշումը»,- հայտնել են ԱԳՆ-ից։
Կողմերը ընդհանուր մտահոգություն են հայտնել մերձավորարեւելյան տարածաշրջանում միջազգային ահաբեկիչների եւ ծայրահեղականների դիրքերի ամրապնդման, Լիբանանը բռնության եւ միջկրոնական հակասությունների միջոցով ապակայունացնելու շարունակական փորձերի կապակցությամբ։
