ԵԱՀԿ Մինսկի խմբի համանախագահների հերթական այցի մասին այսօր լրագրողների հետ զրույցում խոսեց քաղաքագետ Սերգեյ Մինասյանը: «Ներկա պահին ամենակարևոր իրադարձություններից մեկը Հայաստանի համար՝ Մինսկի համանախագահների այցն է տարածաշրջան: Հայտնի է արդեն, որ համանախագահները հանդիպել են Ադրբեջանի ղեկավարության հետ և հիմա պատրաստվում են հանդիպել նաև Հայաստանի և Լեռնային Ղարաբաղի ղեկավարության հետ»:
Ըստ քաղաքագետի, այս անգամ համանախագահները Ադրբեջանի հանդեպ կտրուկ և կոպիտ են արտահայտվել: «Համանախագահները այս անգամ ուշադրություն են դարձրել այն հանգամանքի վրա, որ շփման գոտում լարվածություն է առաջացնում կողմերից մեկը՝ Ադրբեջանը: Ճիշտ է, Ադրբեջանը հիմա ամեն ինչ անում է, որ չզրկվի իր վերջին լծակից, հեռացնում է իր դիպուկահարներին սահմաններից: Վերջին կես տարվա ընթացքում սահմանային լարվածությունը շատ ակնհայտ էր: Համանախագահները, չնայած իրենց դիվանագիտությանը, այս անգամ շատ ընդգծված կոպիտ են արտահայտվել Ադրբեջանի հանդեպ: Արդյոք սա կբերի՞ այն արդյունքին, որին սպասում են շատերը, ես չեմ կարծում»:
Համանախագահների այցը համընկնում է նաև պետդեպարտամենտի կարևոր անձի այցի հետ, նշեց Սերգեյ Մինասյանը: «Համանախագահների այցը տարածաշրջան որևէ կապ չունի Հայաստանի ներքաղաքական զարգացումների հետ: Գլխավոր թեմաներից մեկը, որը քննարկվելու է Հայաստանի և Ադրբեջանի ղեկավարության հետ՝ լինելու է արցախյան հակամարտության կարգավորման հարցը»:
