ՌԴ նախագահ Վ. Պուտինը զգուշացրել է գործողությունների վտանգավորության մասին, որոնք կատարվում են՝ շրջանցելով ՄԱԿ-ի Անվտանգության խորհրդի բանաձեւերը։ Այս մասին նա հայտարարել է՝ ելույթ ունենալով ՄԱԿ-ի Գլխավոր ասամբլեայի հոբելյանական նստաշրջանին։
«Ցանկացած երկրի գորղոծությունը, որը շրջանցում է ՄԱԿ-ի Անվտանգության խորհրդի բանաձեւերը՝ լեգիտիմ չէ»,- հայտարարել է Պուտինը։
ՌԺ նախագահի խոսքերով «ՄԱԿ-ում տարաձայնությունները միշտ էլ եղել են, դա սովորական է այսպիսի ներկայանալի կազմակերպության համար»։ «Եվ վետոյի իրավունքը կիրառվել է միշտ. դրանից օգտվել է եւ ԱՄՆ-ը, եւ Մեծ Բրիտանիան, եւ Ֆրանսիան, Եւ Չինաստանը, եւ Խորհրդային միությունը, ավելի ուշ նաեւ Ռուսաստանը»,- հիշեցրեց ՌԴ ղեկավարը։
Պուտինը նշել է նաեւ, որ ՄԱԿ-ի հիմնադրման ժամանակ «չի էլ նախատեսվել, թե այստեղ թագավորելու է միակարծիքությունը»։ Նա ընդգծել է, որ այս կազմակերպության իմաստը հենց «փոխհամաձայնություններ գտնելն է, իսկ ուժը՝ տարբեր կարծիքների եւ տեսակետների հաշվի առնումն է»։
Պուտինի ելույթի ժամանակ Ուկրաինայի պատվիրակությունը լքեց դահլիճը։
Ուկրաինայի ճգնաժամը կարելի է կանգնեցնել միայն մինսկյան պայմանավորվածությունների կատարմամբ։
«Սպառնալիքներով եւ զենքով Ուկրաինայի ամբողջականությունը չես պահպանի»,- նշել է ՌԴ նախագահը՝ հավելելով, որ պետք է հաշվի առնել Դոնբասի բնակիչների հետաքրքրությունները եւ նրանց ընտրելու իրավունքը։
ՌԴ առաջնորդը նաեւ նշեց, որ Ռուաստանը, նախկինի պես, ԵՏՄ-ի և ԵՄ-ի ինտեգրման լուրջ հեռանկարներ է տեսնում. «Ի հակադրություն «էքսկլյուզիվ» քաղաքականության՝ Ռուսաստանն առաջարկում է տարածաշրջանային տնտեսական նախագծերի ներդաշնակություն, այսպես կոչված՝ ինտեգրացիայի ինտեգրացիա հիմնված միջազգային առևտրի թափանցիկության սկզբունքների վրա»՝ որպես օրինակ բերելով Չինաստանի կողմից «Մետաքսի ճանապարհ» տնտեսական գոտու ստեղծման նախաձեռնության շուրջ ԵՏՄ-ի հետ համագործակցության ծրագիրը։
Պուտինը նաեւ մեծ սխալ համարեց «Իսլամական պետության» դեմ պայքարում Սիրիայի նախագահ Բաշար Ասադի հետ համագործակցությունից հրաժարումը։ Բոլորը պետք է խոտովանեն, որ «նախագահ Ասադի կառավարական զորքերից եւ քրդական խմբավորումներից բացի, իրապես ոչ ոք չի պայքարում ԻՊ-ի դեմ»։ Այդ կապակցությամբ նա ՄԱԿ-ի ղեկավարին կոչ արեց օգնություն ցուցաբերել Սիրիայի կառավարությանը։
