ԱԺ փոխնախագահ Էդուարդ Շարմազանովն այսօր խորհրդարանում լրագրողների հետ զրույցում հաստատեց, որ «Հայկական վերածնունդ» կուսակցության Վանաձորի ավագանու ցուցակը գլխավորող Արկադի Փելեշյանի զավակներն իր եղբոր սանիկներն են:
Նշենք, որ երեկ երեկոյան լուրեր տարածվեցին, որ «Հայկական վերածնունդ» կուսակցության Վանաձորի քաղաքապետի թեկնածու Արկադի Փելեշյանը դաժան ծեծի է ենթարկել Հայ ավետարանական եկեղեցու առաջնորդ Ռաֆիկ Գրիգորյանին:
«Այո, Արկադի Փելեշյանի երեխաները իմ եղբոր սանիկներն են: Ինչ վերաբերում է տվյալ դեպքին, ապա խնդիրն իրավական հարթությունում է, եւ իրավապահները կիրականացնեն իրենց գործառույթները: Ինչպես նախկինում, այժմ էլ հիմա ես չեմ խառնվում իրավապահների գործառույթներին: Անկախ ամեն ինչից` իմ սանիկն է, իմ բարեկամն է, եթե պարզվի, որ նման բան է եղել, ես իմ հստակ դիրքորոշումը կարտահայտեմ: Դա դատապարտելի է»,- լրագրողների հետ զրույցում ասաց Շարմազանովը:
Ըստ ԱԺ փոխնախագահի` կա անմեղության կանխավարկած, եւ ինքը չի ցանկանում կանխակալ գնահատականներ հնչեցնել:
Նշենք, որ ըստ տարածված լուրերի` երեկ երեկոյան «Հայկական վերածնունդ» կուսակցության Վանաձորի ավագանու ցուցակը գլխավորող Արկադի Փելեշյանը՝ Ական, դաժան ծեծի է ենթարկել Վանաձորի Հայ Ավետարանական եկեղեցու առաջնորդ Ռաֆիկ Գրիգորյանին: Հավելենք, որ Փելեշյանը գտնվում է ոստիկանությունում:
