Ինչպես արդեն տեղեկացրել էինք, այսօր «Երկիր ծիրանի» կուսակցության նախագահ Զարուհի Փոստանջյանն իր քարոզարշավը սկսել էր արտոերթով, իսկ երթի կանգառը Սարի թաղն էր, որտեղ քաղաքապետի ընդդիմադիր թեկնածուն շրջեց թաղամասի տներով և հանդիպեց բնակիչների հետ:
Սարի թաղում Փոստանջյանը լրագրողների հետ զրույցում նշեց, որ իրենք գնում են քաղաքապետարանը գրավելու. «Գնում ենք քաղաքապետարանը գրավելու, մեծամասնություն ենք կազմելու և, իհարկե, տապալելու ենք Հանրապետականին: Եվ այնտեղ արդեն համագործակցությունը եթե հնարավոր լինի մեր ծրագրերի, մեր սկզբունքների, մեր գաղափարախոսության շուրջ, ապա մենք կանենք»:
Անդրադառնալով մրցակից մյուս ուժի` «Ելք» դաշինքի քաղաքապետի թեկնածու Նիկոլ Փաշինյանին, Փոստանջյանն ընդգծեց. «Նիկոլ Փաշինյանն այս պահին պատգամավոր է, և նրա տեղը խորհրդարանում է, նա պահանջված է խորհրդարանում: Ես դառնալու եմ քաղաքապետ և սկսում եմ ազատագրումը Երևանից»:
Փոստանջյանը նաև հավելեց, որ եթե կան իրենց միանալ ցանկացողներ, իրենք մեծ սիրով կընդունեն նրանց:
