Հայաստանի նախագահ Սերժ Սարգսյանը Արցախյան հակամարտության վերաբերյալ հարցազրույց է տվել ամերիկյան Bloomberg պարբերականին: Երկրի ղեկավարը նշել է, որ Արցախում պատերազմը կարող է վերսկսվել ցանկացած պահի, իսկ հակամարտությունը բանակցություններով կարգավորելու հեռանկարը փոքր է:
«Ռուսաստանի միջնորդությամբ ձեռք բերված հրադադարը կարող է բավարար չլինել կանխելու ավելի լայնածավալ բախումները ադրբեջանցիների ու հայերի միջև այս ամսվա «քառօրյա պատերազմից» հետո՝ «հարյուրավոր տանկերի» և 30 հազար հրետանային արկերի գործադրմամբ»,- նշել է Սերժ Սարգսյանը:
Նա ընդգծել է, որ Հայաստանի համար անխոհեմ կլինի Ադրբեջանի հետ խաղաղ բանակցություններ վերսկսել՝ առանց անվտանգության երաշխիքների, քանի որ իրավիճակն այսօր միանգամայն այլ է:
«Մինչ մենք մի կողմից բանակցություններ կվարենք, մյուս կողմից զինվորականները մարտական գործողություններ կծավալեն՝ փորձելով լուծել հակամարտությունը»,- նկատել է Սերժ Սարգսյանը:
Հայաստանի նախագահը խոսել է նաև ՌԴ արտգործնախարար Սերգեյ Լավրովի՝ Հայաստան կատարած այցի մասին և փարատել այն կասկածները, թե Լավրովն իր հետ կարգավորման նոր առաջարկներ է բերել:
«Լավրովը իր հետ չի բերել որևէ նոր առաջարկ, քանի որ նա շատ լավ է գիտակցում, որ քառօրյա պատերազմից անմիջապես հետո անիմաստ է բանակցությունների մասին խոսելը»,- ասել է նախագահը:
Ըստ Bloomberg պարբերականի՝ Սերժ Սարգսյանն առաջին անգամ հրապարակայնորեն հայտարարել է, որ հայկական կողմը որոշ տարածքներ է կորցրել ռազմական գործողությունների ժամանակ: Սարգսյանն ասել է, որ ադրբեջանական զորքերը վերցրել են շատ փոքր հատվածներ շփման գծի հյուսիսային և հարավային մասերում, որոնք ոչ մի ռազմավարական նշանակություն չունեն հայկական զինված ուժերի համար:
Սերժ Սարգսյանն անդրադարձել է նաև ռուս խաղաղապահների տեղակայման մասին խոսակցություններին՝ շեշտելով, որ ռուս խաղաղապահներն անելիք չունեն հակամարտության գոտում: Նշելով, որ նախկինում բանակցությունների ընթացքում ռուս խաղաղապահների տեղակայման շուրջ խոսակցությունները «անհիմն չէին»՝ Սարգսյանն ասել է, որ այսօր ինքը նման հնարավորություն չի տեսնում:
«Եթե բանակցություններ չեն վարվում, ինչպե՞ս կարող են ռուսական զինված ուժերը հայտնվել Ղարաբաղում կամ ադրբեջանական և ղարաբաղյան ուժերի միջև», — ասել է Սերժ Սարգսյանը՝ հավելելով, որ Ռուսաստանը «հավասարակշռված քաղաքականություն» է վարում Հայաստանի և Ադրբեջանի միջև՝ փորձելով կանխել լայնածավալ ռազմական հակամարտությունը:
Հայաստանի նախագահը նաև մանրամասներ է ներկայացրել 2011 թվականին Կազանում Ալիևի հետ բանակցությունների վերաբերյալ, երբ ինքը պատրաստակամություն էր հայտնել դուրս բերել հայկական զինված ուժերը հինգ շրջաններից և համաձայնել է խաղաղապահների տեղակայմանը:
«Ռուսաստանի, Միացյալ Նահանգների և Ֆրանսիայի նախագահները երկու երկրների առաջնորդներին հորդորում էին լուծել հակամարտությունը՝ ստորագրելով համաձայնագիրը, որով նաև հետաձգվում էր Լեռնային Ղարաբաղի կարգավիճակի շուրջ վերջնական որոշումը, բայց Ալիևը հրաժարվեց: Դա այն ժամանակն էր, երբ Ադրբեջանը հարստանում էր նավթի հաշվին ու խոսում ռազմական բյուջեի չափերի մասին»- նշել է Սերժ Սարգսյանը՝ եզրափակելով, որ այն, ինչ տեղի ունեցավ հիմա, սպասելի էր:
