Թերթերից մեկում տպագրված և տարբեր լրատվական կայքերում տեղ գտած Կոտայքի մարզի սոցիալական աջակցության տարածքային գործակալությունների մասին համապատասխան հրապարակման վերաբերյալ պարզաբանում ենք. ՀՀ Վերահսկիչ պալատի կողմից իրականացված ստուգումների արդյունքում հայտնաբերված խախտումները պետք չէ վերագրել ներկայիս Ջրային տնտեսության պետական կոմիտեի նախագահ Ա. Հարությունյանին կամ որևէ անձի: Կոտայքի մարզի Սոցիալական աջակցության տարածքային գործակալություններում հայտնաբերված խախտումներն ու թերացումները պայմանավորված են բացառապես հիշյալ գործակալություների աշխատակազմերի գործունեությամբ:
ՀՀ Կոտայքի մարզպետարանի տեղեկատվության և հասարակայնության հետ կապերի բաժին
Նշենք, որ «Ժողովուրդ» օրաթերթն այսօր գրել էր, որ Արամ Հարությունյանը հնարավոր է պաշտոնանկ արվի:
«ՀՀ ջրային տնտեսության պետական կոմիտեի ղեկավար Արամ Հարությունյանը, հնարավոր Է, առաջիկայում պաշտոնանկ արվի և այլևս նոր պաշտոնի չնշանակվի։ Նրա պաշտոնանկության համար կարող Է հիմք դառնալ ՀՀ վերահսկիչ պալատի՝ 2015 թվականի վերաբերյալ տարեկան հաշվետվությունը։ Բանն այն Է, որ բազմաթիվ փաստեր կան այն մասին, որ Արամ Հարությունյանի՝ ՀՀ Կոտայքի մարզպետ աշխատելու շրջանում տեղի սոցիալական ապահովության ծառայության աշխատակիցները պետական բյուջեի միջոցները, մեղմ ասած, վատնել են։
Իհարկե, ՎՊ-ի ստուգումներից հետո հայտնաբերված խախտումներով գրպանված գումարները գործող մարզպետի՝ Կարո Գուլոյանի միջամտությամբ վերադարձվել են պետբյուջե, սակայն, ըստ լուրերի, այդքանով խնդիրը չի լուծվել, քանի որ կատարված հանցանքը շատ ավելի մեծ է»,–գրել էր թերթը։
