Ինչպես արդեն նշել ենք, այսօր մեկնարկել է ՀՀ ԱԺ հինգերորդ գումարման իններորդ նստաշրջանը: Նախքան նիստերի օրակարգին անցնելը, օրենսդիր մարմնի նախագահն անդրադարձավ անցյալ շաբաթ տեղի ունեցած ԵԽԽՎ նստաշրջանին և դրա շուրջ ծավալված զարգացումներին:
«ԵԽԽՎ-ն անցյալ շաբաթ քննարկեց Լեռնային Ղարաբաղի հակամարտությանն առնչվող երկու բանաձև, որոնք դարձան փորձաքար եվրոպական այդ կառույցի համար: Իրականությունը խեղաթյուրող, հակամարտության շուրջ խաղաղ բանակցային գործընթացը արգելակող բանաձևերը փորձ էին վարկաբեկելու այդ բարձր հարթակը և թյուրիմացության մեջ գցելու միջազգային հանրությանը»,- նշեց ԱԺ նախագահ Գալուստ Սահակյանը:
Ըստ նրա՝ ԵԽԽՎ-ում, որը լիազորություններ էլ չուներ, փորձ արվեց ստվերելու նաև ԵԱՀԿ Մինսկի գործունեությունը:
Բանաձևերի արդյունքները ցույց տվեցին , որ խորհրդարանական դիվանագիտությունն ուժեղ զենք է, ուստի պարոն Սահակյանն իր շնորհակալությունը հայտնեց ոչ միայն Հայաստանյան պատվիրակությանը, այլ նաև պատվիրակության անդամ չհանդիսացող գործընկերների, տարբեր կազմակերպությունների ևն՝ իսկությունն ինչպես հարկն է ներկայացնելուն ուղղված ջանքերի համար:
Վերջում կոչ արեց ՝ բանաձևերը չդիտարկել հաղթանակ կամ պարտություն. «Հատկապես որ ասում են՝ պարտությունը որբ է, իսկ հաղթանակը բազում տերեր ունի»:
