Իտալիայի ոստիկանությունը ձերբակալել է 11 գողից կազմված մի ավազակախումբ, որը մեղադրվում է Պարմեզան պանրի 785000 եվրո կամ մոտ 878768 դոլար արժողությամբ 2039 գունդ գողանալու համար: Պանրի յուրաքանչյուր գողացված գունդը գնահատվել է մոտ 430 դոլար: Հանցագործները Պարմա եւ Ռեջո-Էմիլիա շրջաններում հարձակվել են տարբեր պահեստների եւ ֆաբրիկաների վրա, որտեղ արտադրվում էր հայտնի պանիրը: Հաղորդվում է, որ գողությունները կատարվել են մոտ երկու տարվա ընթացքում:
Պարմեզանի պանիրը, որն Իտալիայում հայտնի է որպես Պարմիջանո Ռեջանո, արտադրվում է տեղի կաթի օգտագործմամբ եւ հասունանում է 18-ից 30 ամսվա ընթացքում: Առաջին անգամ այն Պարմայում եւ Ռեջո-Էմիլիայում պատրաստվել է ավելի քան 900 տարի առաջ, տեղեկացնում է Kedem-ը:
Նշվում է, որ պանրի հսկայական գնդերի տեղափոխությունը հանցագործների համար չէր կարող հեշտ խնդիր լինել եւ գողերը բարդ սարքավորումներ են օգտագործել ազդանշանային համակարգը շրջանցելու համար: Իտալացի հանցագործները գուցե լավ վնաս են հասցրել, բայց դա ոչինչ է համեմատած Կանադայում մի քանի տարի առաջ տեղի ունեցած թխկու օշարակի գողության հետ, որի արժեքը 30 միլիոն դոլար էր:
