«Նման խայտառակ վիճակ նույնիսկ 1995-1996 թթ-ներին չկար, այն ժամանակ երկրի վիճակն այնքան վատ չէր, ինչքան հիմա է»: Araratnews.am-ի հետ զրույցում ասաց Սյունիքի թռչնաֆաբրիկայի» տնօրեն Արթուր Գևորգյանը: Նշենք, որ Արթուր Գևորգյանն ամիսներ առաջ մեզ հետ զրույցում վստահեցնում էր՝ ԵՏՄ-ի հետ անդամակցությունը դրական անդրադարձ կունենա ոլորտի զարգացման վրա:
-Պրն Գևորգյան, ամիսներ առաջ, երբ Ձեզ հետ խոսեցինք այն մասին, թե ինչ կտա ԵՏՄ-ի հետ անդամակցությունը Ձեր ֆաբրիկային ու ինչքանով կնպաստի ոլորտի զարգացմանը, Դուք դրական ակնկալիքներ ունեիք…
-Ոչ մի տարբերություն չկա, այս հիմնարկը լավ չի աշխատում, կլինի՞ մեկ ամիս հետո խոսենք:
-Ասում էիք, որ հնարավոր է՝ հունվարից կսկսեք թռչնամիս արտահանել ռուսական շուկա:
-Ոչ մի բան չի ստացվում, միսը շատ էժան է, արտահանումն էլ՝ խնդիր: Նման խայտառակ վիճակ նույնիսկ 1995-1996 թթ-ներին չկար, այն ժամանակ երկրի վիճակն այնքան վատ չէր, ինչքան հիմա է:
-Ֆաբրիկայում երդրումներ չե՞ն եղել:
— Ոչ:
-Իսկ վարկեր չե՞ք վերցրել Կառավարությունից՝ առկա խնդիրները լուծելու նպատակով:
-Ոչ, դեռ այդ մասին մտածում եմ:
-Ֆաբրիկան ի՞նչի կարիք ունի այսօր:
-Հայաստանում ստաբիլ առևտուր չկա և առհասարակ ոչ մի բան կանոնակարգված չէ, չգիտես՝ վարկ վերցնես, հետո ի՞նչ անես:
-Այսինքն՝ հնարավո՞ր է հետո չկարողանաք մարել:
-Այո, իհարկե:
-Իսկ արտադրանքի իրացման խնդիր կա՞:
-Այս պահին արտադրաքն էլ չկա, իսկ եթե լինի, ապա իրացման խնդիր կառաջանա:
-Ի՞նչ քայլեր եք ձեռնարկելու այդ վիճակից դուրս գալու համար:
-Պատրաստվում եմ մի քիչ զարգացնել, հետո տեսնեմ՝ շուկայում ոնց եմ շարժվում, ժամանակի ընթացքում կերևա:
-Տեղական շուկայում ի՞նչ խնդիրներ կան:
-Այնքան մեծ խնդիր կա: Մեկն այն, որ բոլորս միասին չենք կարողանում որոշակի քանակ արտադրել, բացի դա՝ չենք կարողանում պայմանավորվել և գնային ճիշտ քաղաքականություն վարել. ով ինչ գնով ուզում, վաճառում է:
—Ո՞վ է պատասխանատու այդ ամենի համար:
-Բոլոր երկրներում գյուղնախարարություններն են զբաղվում այդ տեսակ հարցերով, մեզ մոտ ոչ մեկը: Կա Հայաստանի թռչնաբույծների միություն, որն այդքան էլ լիազորություններ չունի, իսկ թե գյուղնախարարությունում ով է զբաղվում այդ հարցերով՝ չեմ կարող ասել:
-Ֆաբրիկայում աշխատողների կրճատում եղե՞լ է:
-Այո, մի քանի հոգու ժամանակավոր կրճատել ենք, բայց հուսով եմ՝ կվերականգնենք:
