«Օրինաց երկիր» կուսակցության նախկին պատգամավոր, «Ոսկեվազ» կոնյակի գործարանի տնօրեն Հովհաննես Մարգարյանը նախորդ տարի Գյումրու քաղաքապետի ընտրություններում սկանդալի մեջ հայտնվեց:
«Գյումրեցու ոգի» կուսակցությունը 2016-ի սեպտեմբերի 30-ին Գյումրու տեղական երեք հեռուստաընկերություններով «Ճանաչիր» վերնագրով տեսանյութ էր հրապարակել, որը պատմում էր, թե ինչպես է Հովհաննես Մարգարյանը 1988-ի երկրաշարժից հետո որպես հումանիտար օգնություն Հայաստան ուղարկված կաթի փոշին գողացել: Օրենսդիր մարմնի անդամը հրապարակված տեսանյութը համարել էր զրպարտություն, դիմել էր դատարան` նյութական ու բարոյական վնասի փոխհատուցման պահանջով:
Արդեն մեկ տարի է, որ շարունակվում է դատական գործընթացը: Araratnews.am-ն այսօր Հովհաննես Մարգարյանի փաստաբան Ալբերտ Դերձակյանից տեղեկացավ, որ կաթի փոշու գործը դատաքննության փուլում է: Շիրակի մարզի ընդհանուր իրավասության դատարանը` դատավոր Հայկանուշ Միքայելյանի նախագահությամբ, քննելու է ապացույցները: Դատական հաջորդ նիստը տեղի կունենա սեպտեմբերի 26-ին:
Ի դեպ, պատասխանող կողմը, հաշտության առաջարկ էր արել, մասնավորապես, խոստովանել էր, որ զրպարտել է Հովհաննես Մարգարյանին, բայց մերժել էր բարոյական ու նյութական վնասի փոխհատուցման պահանջը:
Մեր հարցին՝ հնարավո՞ր է, այնուամենայնիվ, հայցվոր ու պատասխանող կողմերը համաձայնության գան, Հովհաննես Մարգարյանի փաստաբանը բացասական պատասխանեց. հաշտություն չի լինելու, կսպասեն դատարանի վճռին:
ՍՈՆԱ ԴԱՎԹՅԱՆ
