ՆԱՏՕ-ն անհանգստացած է Վրաստանի խորհրդարանի «Միասնական ազգային շարժում» կուսակցության ընդդիմադիր պատգամավոր Գիվի Թարգամաձեի ավտոմեքենայի պայթյունով` հաղորդել է ՆԱՏՕ-ի գլխավոր քարտուղարի` Հարավային Կովկասի և Կենտրոնական Ասիայի երկրների հարցերով գլխավոր քարտուղար Ջեյմս Ապատուրայի հատուկ ներկայացուցիչը:
Հիշեցնենք, որ Վրաստանում խորհրդարանի ընտրություններ կանցկացվեն հոկտեմբերի 8-ին: Գլխավոր մրցակիցներն են իշխող «Վրացական երազանք» կուսակցությունը և ընդդիմադիր «Միասնական ազգային շարժումը»:
«ՆԱՏՕ-ն անհանգստացած է բռնության փաստերով, որոնք տեղ են գտել ընտրական գործընթացում, վերջերս թեկնածուի ավտոմեքենա է պայթեցվել: Նախընտրական շրջանը պետք է անցնի հանգիստ մթնոլորտում` ժողովրդավարության բարձր սկզբունքներին համապատասխան»,- գրել է Ապատուրայը «Ֆեյսբուքի» իր էջում:
Հիշեցնենք, որ երեքշաբթի երեկոյան Թբիլիսիսի կենտրոնում պայթեցվել էր «Միասնական ազգային շարժում» ընդդիմադիր կուսակցության պատգամավոր Գիվի Թարգամաձեի ավտոմեքենան: Պատգամավորն ու իր վարորդը ստացել էին աննշան վնասվածքներլ, իսկ չորս անցորդ` վիրավորումներ: Տուժածներից մեկի վիճակը գնահատվում է ծանր: Պայթյունի հետևանքով վնասվել են նաև շուրջ գտնվող 10 ավտոմեքենա:
Թարգամաձեի կարծիքով` պայթյունի կազմակերպիչներ կարող են լինել պետանվտանգության ծառայության բարձրաստիճան պաշտոնյաներ: Վրաստանի ՆԳՆ-ը իրականացնում է քննություն` դիտավորությամբ մահ պատճառելու հոդվածով:
