Ռուսական «Կապույտ հեծյալ» մշակութային շարժման ակտիվիստներ Օլեգ Բասովը և Եվգենի Ավիլովը Մոսկվայի Կարմիր հրապարակում փորձել են Լենինի դամբարանից քշել չարքերին: Այս մասին հաղորդում է grani.ru-ն:
Բասովն ու Ավիլովը սուրբ ջուր են լցրել շինության դռների վրա՝ բղավելով «վեր կա՛ց ու հեռացի՛ր»: Նրանց խոսքերով՝ գործողությունը խորհրդանշում է սովետական մութ, դեռ չթաղված անցյալից ազատվելու ռուսների ձգտումը:
Երկու ակտիվիստներն էլ ձերբակալվել են: Նրանց մեղադրում են մանր խուլիգանության մեջ, որը ենթադրում է մինչև 15 օր ազատազրկում:
Երեկ Ռուս ուղղափառ եկեղեցին նշում էր Հիսուս Քրիստոսի մկրտության օրը: Հավատացյալներից շատերը համարում են, որ այդ օրը ցանկացած ջուր դառնում է սուրբ:
