ԱԺ պատգամավոր Վահան Բաբայանն, այսօր ԲՀԿ-ից դուրս գալու դիմում է ներկայացրել: Երիտասարդ խորհրդարանականն օրեր շարունակ դրա մասին էր խոսում, հայտարարություններ անում, ժամ առ ժամ «սպառնում», թե ուր որ է կլքի ԲՀԿ-ն: 34-ամյա Բաբայանն արդեն վեցերորդ կուսակցությունն է լքում: Քաղաքականություն իր քայլերը Բաբայանն արել է Խոսրով Հարությունյանի «Քրիստոնեա-դեմոկրատական» կուսակցությունում, լինելով այդ կուսակցության անդամ: Բաբայանն, ապա դարձել է «Հանրապետություն» կուսակցության անդամ, հետո դարձել՝ Երիտասարդական կուսակցության անդամ: Այստեղ էլ իր տեղը չի գտել ու տեղափոխվել է ՄԻԱԿ: Ու քանի որ այս կուսակցության միայն անունն է հայտնի, Բաբայանը շուտով որոշում է կայացնում հանգրվանել «Բարգավաճ Հայաստանում»՝ Ծառուկյանի հովանավորության ներքո:
Հիմա էլ ԲՀԿ-ից է դուրս գալիս, որովհետև երիտասարդի սիրտը կոալիացիա է ուզում: Վահան Բաբայանը իրեն ընդդիմադիր չի համարում, իսկ քանի որ ԲՀԿ-ն դե ֆակտո խորհրդարանում ընդդիմություն է, Բաբայանը իր տեղն այլևս այդ կուսակցությունում չի գտնում: Թե ինչու՞ հատկապես հիմա Վահան Բաբայանը հասկացավ, որ ընդդիմադիր կեցվածքն իրենը չէ, պարզ է: Երբ ԲՀԿ-ն ղեկավարում էր Գագիկ Ծառուկյանը, Վահան Բաբայանը օգտվում էր Բարգավաճի պտուղներից, հիմա Ծառուկյանը քաղաքականություն չէ, չի ֆինանսավորում նաև ԲՀԿ-ն, հետևաբար, մի քանի կուսակցություն փոխած Բաբայանը պտուղներից օգտվել չի կարող:
Իշխանության հետ կոալիցիա կազմելու որոշումը երկու ձեռքով ողջունում է մի Բաբայան, որը մոտ երկու տարի առաջ կոչ էր անում օր առաջ ազատվել չարիքի այս իշխանությունից, բարիկադներ կազմելու պատրաստակամություն էր հայտնում: Հիմա Բաբայանն ամբողջ մարմնով նետվում է դեպի իշխանություն, բայց դժվար թե նրան այնտեղ սրտաբաց ընդունեն: Բաբայանի քաղաքական ճանապարհով անցածների պակաս իշխող Հանրապետական կուսակցությունը չունի, հետևաբար, ևս մեկով ավելացնել առանց այն էլ վարկաբեկված կուսակցությունը ՀՀԿ-ն դժվար թե անի:
Առավել հետաքրքրական է Վահան Բաբայանի «հրաժեշտի» դիմումը: ԲՀԿ ղեկավարին ուղղված իր նամակում նա գրել է. «Հարգելի տիկին Զոհրաբյան, արդեն տևական ժամանակ է, շրջանառվում է իմ` կուսակցությունը լքելու մասին լուրը: Երկար քննարկումներից հետո, իսկապես ես որոշեցի դուրս գալ կուսակցությունից: Սա բացառապես իմ անձնական որոշումն է` թելադրված իմ քաղաքական հայացքներով, կամքով և խղճով: Ես շարունակելու եմ իմ ողջ եռանդով և ներուժով ծառայել Հայաստանին ու մեր ժողովրդին, իսկ «Բարգավաճ Հայաստանին» մաղթում եմ կանաչ ճանապարհ և հաջողություն:
Քաղաքական հայացքնե՞ր. առավել քան զարմանալի է, նկատի ունենալով վեր նշվածը: Երիտասարդի քաղաքական գիծն այնքան խայտաբղետ է, որ դժվար թե կամքն ու խիղճը որոշումը կայացնելու հարցում դերակատարություն են ունեցել:
Թե որ կուսակցությունը կլինի Բաբայանի հաջորդ հանգրվանը՝ ցույց կտա ժամանակը: Չընդդիմադիր կուսակցությունների պակաս Հայաստանում չկա:
