Ստեփանակերտի քաղաքապետ Սուրեն Գրիգորյանը հրավիրել է շտապ խորհրդակցություն՝ սեպտեմբերի 25-ին ղարաբաղաադրբեջանական հակամարտ զորքերի շփման գծում դժբախտ միջադեպով պայմանավորված մայրաքաղաքի օրվա տոնակատարության կազամակերպման և անցկացման միջոցառումների ծրագիրը չեղյալ հայտարարելու վերաբերյալ: Ինչպես հաղորդում է «Արմենպրես»ը, այս մասին «Արցախպրես»ի թղթակցի հետ զրույցում ասաց Ստեփանակերտի քաղաքապետի տեղակալ Արմեն Հակոբյանը: «Նախատեսված տոնական միջոցառումները չեն կայանալու», հակիրճ ասել է Հակոբյանը: Սեպտեմբերի 25ին` ժամը 17:30ի սահմաններում, ադրբեջանական զինուժի կողմից թուրքական արտադրության TR107 կայանքներից հրթիռահրետանային արկակոծման է ենթարկվել ՊԲի հյուսիսարևելյան ուղղությամբ տեղակայված զորամասերից մեկի պահպանության տեղամասը, որի արդյունքում բեկորային մահացու վիրավորում են ստացել ՊԲ զինծառայողներ Նորայր Միքայելի Խաչատրյանը (ծնված 1995թ.), Ռոբերտ Սուրենի Մկրտչյանը (ծնված 1995թ.), Հարութ Մաքսիմի Հակոբյանը (ծնված 1997թ.) և Կարեն Գևորգի Շահինյանը (ծնված 1997թ.): Ադրբեջանական կողմի կրակոցներից Տավուշի մարզի Բերդավան համայնքում սեպտեմբերի 24ին զոհվել է 2 քաղաքացիական անձ, 2ը` վիրավորվել: Զոհված քաղաքացիներն են` 1974 թվականին ծնված Սոնա Ռևազյանը և 1921-ին ծնված Շուշան Ասատրյանը: Ավելի վաղ հայտնի էր դարձել, որ Տավուշի մեկ այլ սահմանամերձ Պառավաքար համայնքում հակառակորդի կրակոցից զոհվել է 83-ամյա Պայծառ Աղաջանյանը:
