Լոս Անջելեսի Վուդլենդ Հիլս թաղամասում հրազենային վնասվածքներից զոհվել է 37-ամյա հայազգի Հովիկ Կրբոյանը՝ հաղորդում է Los Angeles Times-ը: Նրա վրա կրակել են՝ իր տան դուռը բացելիս:
Լրատվական գործակալությունը մանրամասնում է, որ Կրբոյանը պիցցա էր պատվիրել ու առաքումը ստանալու նպատակով բացել է դուռը: Սակայն, ըստ իրավապահների, պիցցայի առաքչի փոխարեն Կրբոյանի առջև են հայտնվել մարդասպանները: Կրբոյանը տանը եղել է կնոջ ու դստեր հետ:
Տղամարդու ուղղությամբ արձակվել է մի քանի կրակոց, ինչից հետո Կրբոյանը մահացել է:
Ոստիկանությունը ենթադրում է, որ նման բնույթի դեպքերը հաճախ կապված են լինում բիզնեսին վերաբերող կամ ներընտանեկան վեճերի հետ:
Սպանության դրդապատճառները դեռ պարզ չեն:
