Կրեմլում ափսոսում են, որ Լեռնային Ղարաբաղում ռազմական բախումների պատճառով բազմամյա հակամարտության կարգավորման գործընթացում հետընթաց է տեղի ունեցել, LifeNews-ի փոխանցմամբ` հայտարարել է ՌԴ նախագահի մամուլի քարտուղար Դմիտրի Պեսկովը:
«Մինչև թեժ բախումները դրական քայլեր էին արվել հակամարտության կարգավորման ուղղությամբ, իսկ հիմա, ցավոք, հետընթաց է տեղի ունեցել»,- ասել է Պեսկովը: Նա ընդգծել է, որ Ռուսաստանը լավ և գործընկերային հարաբերություններ ունի Երևանի ու Բաքվի հետ և այդ հարաբերություններն օգտագործում է հակամարտությունը կարգավորելու համար:
«Անշուշտ, իրավիճակը շատ հեռու է կայուն լինելուց, հետևաբար, անհնար է կանգ առնել ձեռք բերվածի վրա, և ոչ ոք չի պատրաստվում դա անել»,- եզրափակել է Վ. Պուտինի մամուլի քարտուղարը:
