Բուդապեշտում կայացել է Եվրոպական ֆուտբոլային ասոցիացիաների միության (ՈՒԵՖԱ) կոնգրեսը, որի ընթացքում քննարկվել է կառույցին Կոսովոյի ֆուտբոլի ֆեդերացիայի միանալու հայտը, տեղեկացնում է ՈւԵՖԱ-ի պաշտոնական կայքը:
28 անդամ երկիր կողմ է քվեարկել Կոսովոյի միանալուն, 24-ը` դեմ, իսկ 2 ձայն համարվել է անվավեր: Այսպիսով` Կոսովոյի ֆուտբոլի ֆեդերացիան դարձավ ՈւԵՖԱ-ի անդամ:
Սերբիայի Ֆուտբոլային միության ղեկավար Տոմիսլավ Կարաջիչը նշել է, որ չպետք է Կոսովոյին ընդունել ՈՒԵՖԱ-ի շարքերը, քանի որ այդ որոշումը կնշանակի, որ քաղաքականությունը խառնվում է ֆուտբոլին:
Նշենք, որ Կոսովոն մասնակիորեն ճանաչված պետություն է Բալկանյան թերակղզում: Սերբիան Կոսովոն համարում է իր տարածքի ամբաժանելի մաս, սակայն վերջինս հռչակել է իր անկախությունը, որը ճանաչել են ԱՄՆ-ն ու եվրոպական պետությունների մեծ մասը:
