Աշխատանքային քննարկման ժամանակ այսօր ՀՀ արդարադատության նախարարի տեղակալ Սուրեն Քրմոյանը նշել է, որ Հայաստանի քրեակատարողական հիմնարկներում խրախուսվում են աշխատանքը, սպորտը և կրթությունը:
Քրեակատարողական հիմնարկների ամենահրատապ հարցերի վերաբերյալ նպատակային հայեցակարգի մշակմանն ուղղված վերջինս հայտնել է, որ դատապարտյալը գտնվելով քրեակատարողական հիմնարկում՝ հասարակությունից չի առանձնացվելու:
«Մենք շարունակաբար աշխատանք ենք տանում վեր հանելու ռիսկերի և պահանջմունքի գործիքի հիման վրա դատապարտյալի կարիքները, հանցագործության կատարման պատճառները: Կարևոր է հատուկ լիցենզավորված ծրագրեր կիրառելու միջոցով աշխատանք տանելը, որ տվյալ անձը ազատվելուց հետո այլևս չվերադառնա քրեակատարողական հիմնարկ»,- ասել է Քրմոյանը:
Նրա խոսքով` շատ դեպքերում քրեակատարողական հիմնարկներում անձի երկարատև գտնվելը հնարավոր է ոչ բարենպաստ հետևանքների հանգեցնի, և 5-6 տարի հետո անձի մոտ լուրջ հոգեբանական խնդիրներ առաջանան:
Քննարկումը կազմակերպել է Միջազգային իրավական համագործակցության գերմանական հիմնադրամը՝ ՀՀ արդարադատության նախարարության աջակցությամբ:
