ՀՀԿ- ՀՅԴ վերջնական համաձայնության դեռ չեն եկել: Կա միայն նախնական համաձայնություն, Araratnews.am-ի հետ զրույցում ասաց ՀՀԿ մամլո խոսնակ Էդուարդ Շարմազանովը: Հիշեցնենք, որ նախնական համաձայնության մասին արդեն իսկ հայտարարվել էր չորեքշաբթի օրը տեղի ունեցած ՀՀԿ ԳՄ նիստում: Նիստի ավարտից հետո Էդուարդ Շարմազանովը հայտարարել էր, որ նախնական համաձայնություն է ձեռք բերվել, վերջնականի մասին էլ պետք է հայտարարվեր շաբաթվա վերջում:
Շաբաթն ավարտվում է, սակայն ՀՀԿ- ՀՅԴ քաղաքական ամուսնությունը օրինական ձև չի ստացել: «Ես ասել եմ, որ ընդհանուր առմամբ նախնական համաձայնություն կա, վերջնականին սպասեք՝ շուտով: Այսինքն, որևէ բան չի փոխվել, նախնական պայմանավորվածությունը ուժի մեջ է, պայմանավորվածությունը ձեռք է բերվել»,- ասաց ՀՀԿ մամլո խոսնակը: Վերջնական երբ պարզ կլինի՞, հարցին, Շարմազանովը պատասխանեց. «Վերջնականի մասին, երբ կլինի՝ կիմանանք: Քանի դեռ հայտարարված չէ, ուրեմն չկա»: Էդուարդ Շարմազանովը նշեց, թե ինչ-որ ինքն արդեն ասել է չորեքշաբթի օրը՝ ուժի մեջ է:
Ի դեպ, երեկ ՀՀԿ առանձին գործիչներ վստահեցնում էին, թե Բաղրամյան 26-ում տեղի ունենալիք հավաքի ժամանակ Սերժ Սարգսյանն անդրադառնալու է նաև ՀՅԴ- ՀՀԿ համագործակցության թեմային, սակայն Սարգսյանը որևէ կերպ այդ հարցին չանդրադարձավ:
ՀՅԴ-ից էլ պարզաբանում ստանալ չհաջողվեց: Դաշնակցական գործիչների հեռախոսները կամ անջատված են, կամ նրանք չեն պատասխանում զանգերին:
